mi(sual).com

Source : Nghet taka ding zelin  by M.Lalmanzuala

Kum 1954 khan Brother-te sawmna ngai pawimawhin Pu Vankhama leh a pawlte kan sikulah lo kalin violin leh tingtangte nena remin zai program an rawn nei a. An zai kha thiam kan ti hle mai. Keini tan chuan violin te phei chu kan hmuh vawi khatna leh a ri pawh kan hriat vawi khatna a ni a, a ropui kan tizual a ni. Hla dang bakah Hmangaihna leh Parte nang min tingai zual \hin e tih hla an rawn sa a, thiam kan ti tlang hle a ni. A fate, Margaret Vanhmingthangi, Councilthanga leh Vansanglurate’n an tawiawm a, u Vansanglura kha a bass a, a hneh khawp mai. A fate bakah Ngila leh Rozuala an lo tel bawk. Vanhlupuii hi kum 8 mi a nih lai a ni a, dawhkan chunga dingin, Tlaizawng Par hla a sa a, thiam kan ti hle a ni.

Amah Pu Vankhama tak kha ka bel hnai hman lo nain, a fate nen thung chuan kan inhre tha khawp mai. U Vanhmingthangi kha St. Paul’s School-ah rei lo te zirtirtu hna a rawn thawk ve a, chuta tang chuan kan inhmelhriat zui ta a, U Vansanglura kha St. Paul’s School-ah a rawn lut bawk a, min duh hle thin a, nau en tak hian min en thin a ni. Vanremthanga nen phei chuan kan inpawl rual thin a, kan inkawmngeih hle \hin a ni. Tun hnu-ah phei chuan kan thian kawm dangte a lo inang ta zel bawk a, kan inngaina lehzual ta a ni. Vanduaithlak takin mi a boralsan hma deuh a, a ngaihawm \hin khawp mai.

Pu Vankhama kha Mizoramah chuan mumal deuha “zai pawl” nei hmasa ber a nih a rinawm. A pawlah khan khang hun laia zai thiam leh rimawi tum thiam chu an kim viau \hin. Vocalist chu, Rozuala, Zaihanga, Thangdela, Vanbuka, Lalzuia leh K.L.Hnuna te an ni a. Rinliana kha Guitarist a ni a, Ngila leh P. Lalthianghlima te kha Hawain guitarist an ni a. Lalsangliana’n Accordion a hmet \hin a, J.F.Laldailova’n Trumpet a tum thin. Amah Pu Vankhama khan Violin a tum thin thung a ni.

Pu Vankhama kha pa ngelnghet, Saptawnga ‘principle’ leh ‘self respect’ an tih nei tha tak a ni a. Mizo zingah hetiang mi hi kan neih tlem em avang leh mi mal taka hetiang hi ka ngaihsan zawng tak a nih avangin, hemi kawnga a chanchin chhinchhiah tlak zualte sawi lan a thain ka hria.

Vanduaithlak taka a nupui hmasa a sun hnua, tumah rawn loa nupui a neih leh khan, a fate kha puitling an lo ni deuh vek tawh bawk a, a nupui neih leh kha pawi an ti lo a, a tha pawh an tihpui viau zawk a, amaherawhchu a hming tala a rawn lo kha an vui deuh tih a hriatin, “In nu ka neih dawn khan ka rawn che u em ni?” a ti daih mai a. Hei hian awmze thuk tak a nei a ni tih chu a hre fuh pawl tak niin ka inngai a ni.

Kum 1950 chho vela Sawrkarin motor dah nana tuna Canteen kual kan tih taka mi eng emaw zat hmun an pekte kha motor dah nana hmang alawi an awm loh avangin, Revenue department mite’n an lehkha ‘surrender’ turin an ti a. A motor neih ve kha a accident a, hman tlak mang loha a awm reng lai a nih bawk avang khan a lo inthiam lo sa viau ni tur a ni, a lehkha a va ‘surrender’ hnua ina a lo haw chuan, “Eri(a nupui), ka chhia leh \ha hriatna a thiang ta vak e,” a ti a ni.

Chutiang hmun nei, lehkha pe let ve erawh sawi tur an awm lo a ni ang. Pu Vankhama khan ‘a fal’ nih a hlawh ang a, mi dangte kha chuan ‘fing’ nih an hlawh thung ang. Tunlaia Sawrkar hnathawk aikal la ve duh lote, sumdawng ve duh lote’n ‘a’ nih an hlawh a, aikal la a, sumdawngte’n fing nih an hlawh ang deuh hi a ni ang.

Zu-in tawk an awm reng a, zu zuar an awm si lo kha tha ti loin Bawrhsapin hmar lam atan Pu Vankhama, chhim lam atan Pu Lalbuaia zu zawrh phalna a pe a. Kohhranin tha an tih loh thu an hrilhin, Pu Vankhama chuan sawrkar phalna neia thil tih chu Kohhranin thil suala ngaih theih ni loa a hriat thu a hrilh ve \hung a. Zu a zawrh zel chuan Kohhran dan chhunga a awm theih loh tur thu an hrilh khan Pu Vankhama khan Kohhran chhuahsan zawk a thlang ta a ni. Zu zawrh a thlahlel tihna ni loin ram dan anga thil tih a thiang a, a dik a, ram dan kalha thil tih chu a dik lo nia ngaihdan nghet tak a neih vang a ni zawk.

Tum khat Krismas laia an zaikhawmin an tui viua a, lam tawk an awm deuh reng bawk a. Bawrhsap Pu Barkataki-a’n Pu Vankhama a la lam ve miah lo tih a hmuhin lam turin a ti a. Pu Vankhama’n lam ngai reng reng lo a nih avanga a lam dawn loh thu a hrilh a. Pu Barkataki-a’n Bawrhsap thu a ni a, a lam tur a ni, a lam hma chuan tumah haw theih a ni lo ang ti-a, a’n vau pawhin a lam duh chuang lo a. Chuvang ringawt chuan Pu Barkataki chuan Pu Vankhama in ‘pass’ a ‘cancel’ sak a.

Thian thate vawi duai lo an palai hnuah pawh Pu Barkataki-a kha pa luhlul leh mahni thu duh mi tak a nih avang khan an inrem thei lawk lo a. A tawpah chuan a inphahhniam theihna ber tiin, Pu Vankhama chu thenawm hnai hmun ruak(Pu Bualhranga dawr in ni ta hi)-a thlam tiat leka sa a, zan khat tal riak chhuak turin a ti a. A thupek awmze nei miah loa a chan a duh lo a ni. Chu pawh chu Pu Vankhama’n a tih duh chuan loh avangin Pu Barkataki khan inremna lehkha a ziak a. Pu Vankhama hriata a chhiar chhuah hnuah a hming ‘sign’ hnan turin a ti a. A thuziak tawp lamah khan Pu Barkataki khan, ‘ka hmelhriat tha Vanthangliani nuta-pa a nih vang tal pawhin’ tih thu a lo telh a. Chu pawh chu Pu Vankhama’n a farnuin hming that nan aia hming chhiat phah nana a hman a hlauh avangin a pawm lo a, chu lai chu thai chhe turin a ti a. Pu Barkataki meuh pawhin tih ngaihna a hre ta lo a, dawl zawrin ka zawr, ti ang tlukin, thai chhiat ngai lai chu a thai chhia a, an inrem ta a ni. Hnehtu Pu Vankhama.

Pu Vankhama kha ft. ruka sang, hun eng emaw chhung chu Mizo zinga sang ber nih hlawh thin, hmaitlang pawh nei tha tak a ni a. Lukhum parh(felt hat) a’n khum te kha a inhmeh em em mai a, cowboy cinema-a a thusa pawl niawm tak te khan a lang thin a ni. Sap-ho hi an rilru tetna lamah chuan te ve tak an ni a. Pu Vankhama lukhum parh khum kha an khap sak tawp mai a ni. Kohhranhoin Sawrkar zu an khaptir nen te pawh hian a inang viau ang.

Pu Vankhama kha eizawn nana thlalak hmang hmasa pawl a ni bawk. Thlalakna lian tak, ke pathum inkawkalh chunga daha, puan hlai tawka khuh thim ngai chi an hman thin lai kha a ni a. A buaithlak duh khawp mai. Pu Vankhama te ang pa ruakhau deuh tihawm tak pawh kha a ni. A thlalak te kha a uluk a, a langchiang tha bik deuh tih a ni thin.

Similar Posts:

• Pu Vankhama Hla Thulkhung !
• Tlangval Te Tana Thurawn
• Hotel Management chungchang
• Edenthar venga Kumpuan committee member Pu Lalzarliana chu phone hmanga ko chhuakin na taka sawisak a ni.
• Ka Fapa Lehkha Ka Thawn Ve a…

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, April 14th, 2013 at 10:20 pm and is filed under Copy Paste, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.