mi(sual).com

Bible-in, “Thil engkim tih ka tan a thiang a, nimahsela thil engkim tih a ţha kher lo; thil engkim tih ka tan a thiang a, nimahsela eng bawihah mah ka inphal lo… Thil engkim tih a thiang a, nimahsela thil engkim tih a ţha kher lo. Thil engkim tih a thiang a, nimahsela thil engkim tihin mi a siam ţha lo” (1 Kor.6:12, 10:23) a tih avangin, Zu in ringawt hi sual a ni lova, Zu in sual (hman sual/abuse) erawhchu sual lian tak a ni thei an tih hi a dik hle a ni. Bible-ah hian Zu in vang ni lova, Zu in sual (ruih sual/hman sual) avanga chanchin lungchhiat-thlâk tak tak thleng min record sak nual a. Zir chhuah tur a awm beiseiin ka rawn lawr-khawm a ni.

1. Nova A Rui Sual, A Zahmawh A Lang! (Gen. 9:21-25, Heb.11:7)
Nova, Pathian ţih dek a, a chhungte chhandamtu, rinnaa kan pa meuh khan Zu a siam a, a in a, a in nasa lutuk deuh. A rui-sual a, a la mu-sual zui! Nova Zu rui sual hian nghawng ţha lo tak mai a nei a. A Zu rui mu-sual chu a fate zinga pakhat-in a zahmawh lang a hmu a! A tupa Kanaan leh a thlah-ten ânchhia an dawn phah ringawt bawk! A Zu ruih sual vanga zahmawh langa a mu khan a thlah-te zingah an chhia a thlen phah a nih chu, ava ţha lo em! Zu hi kan in pawhin chhungte leh thlahte ânchhia dawng khawp khawpin in rui lo ila a ţha ang.

2. Lota Zu Rui Chu A Fanu-ten Sex An Hmanpui! (Gen.19:32-33)
Ava râpthlak em! A Zu ruih sual mah a pawi tawh nâk alaiin, a hriat miah lohvin a fanu-ten sex an lo hman-pui zui a nih chu! Bible scholar-te chuan Lota hian Nova hnung zuiin hetiang thil sual râpthlak tak hi a tawng ta a ni, an ti! Pathian duhloh thil chuan nghawng ţha lo tak mai a rawn nei ta. A fate (thlahte) Moab mite leh Ammon mite chu Israel-te hmêlma chimawm ber-te zinga mi an lo ni chho ta rêng a ni. Lota khan Zu kha rui sual lo ta se chuan, khatiang thil tênawm leh râpthlak kha a thleng lo tur a nia le!

3. Puithiam Nadab leh Abihu Zu Ruih Vangin An Thi! (Lev.10:1-11)
Puithiam Arona fate Nadaba leh Abihua-te thih chhan hi ngaihdan dan 4 a awm a, (1) Mei hi Maicham atanga lâk tur a ni a, Maicham aţang hian an la lo a ni ang (cf. Lev.10:12), (2) A hun dik lohvah thilhlan hi an hlân a ni ang (cf. Ex.30:7-9), (3) Hmun thianghlim berah an lut palh a ni ang (kum 1-ah Puithiam Lalberin vawi 1 chauh a lut thei)(cf. Lev.10:12-13), (4) Zu an rui a ni ang (cf. Lev.10:9), tih te a ni.

Bible scholar-te chuan, he thil thlen zawh chiah-a Pathian thusawi, “Nang emaw I fapate emaw pawhin inbiakna puan in chhûnga in kal laiin uaiin leh zu reng reng in suh u, chutilochuan in thi ang. in thlahte zel thlenga kumkhaw dan tur a ni ang a” (Lev.10:9) tih thu an zirchian hian, Puithiam Arona fate hian Zu an in a, an rui a, an rui lungpuam chuan Pathian thupek lohvin rui chungin hâlral thilhlan an lo hlân ve ringawt niin an ring a ni. Puithiam Arona fate, Puithiam atan-a training mêk-te (puithiam tia koh theih an ni tawh) thiltih hi a râpthlak hle mai!

4. Israel Lal Ela Chu A Zuruih Laiin Thah A Ni (1Lalte.16:8-10)
Israel Lal 4-na Lal Ela chu Israel-te chungah kum 2 chauh a Lal hman tiin, a puipa Zimria, a tawlailir zât ve chunga hotu-in a phiar ru a. Lal Ela hian Zu a in a, a in in-rui lai (rilru fim loh lai tak) chu Zimria chuan a bei a, a that a, a aiawhin a lalţhutthleng a luah a ni. Bible scholar-te chuan Israel leh Juda Lalte rêng rêng hi Indo-hrât leh chak tak (warrior) an ni tlangpui a. Rui lo hai lova râlthuam kenga inbeih râlah chuan an Sipaite tan hneh rual leh cho rual an ni lo, an ti! Isreal Lal Ela hi Zu rui lo sela chuan, Indo-mi pawh ni lo Zimria hian a thah mai theih an ring lo. Pathian ruat a chunga thleng ni mahse a tih tur ti ţha hlei thei lo leh rilru fim lo khawp khawpa Zu in ruih pawi zia a entir chiang hle a ni.

5. Babylon Lal Belsazzara Chu Zu A Ruih Laiin Thah A Ni (Dan.5)
Lal Belsazzara chuan a miropui sângkhat-te tan ruai ropui tak a ţhehsak a, sâng hmâah chuan Zu a in a. A ruih deuh chinah chuan a pa Nebukadnezzaran Jerusalem Temple ata a lâk chhuah rangkachak leh tangkaraw bungbêl-te chu rawn la tûrin thu a pe a; lal leh a mi ropuite leh a nupui te leh a hmeiten Zu inna atân an hmang ta a. Tichuan, rangkachak te, tangkarua te, dâr te, thing te, lungte-a siam pathian-te chu an chawimawi dur dur a!

Chumi lai tak chuan mihring kut zungţang hi a lo chhuak a, lal in bang kulh, khâwnvâr dahna ep lamah chuan a rawn ziak ta a; tin, lal chuan a ziaktu kuttum bung chu a hmu a. Tichuan, lal chu a hmêl a dâng a, a rilru te chu a buai zo va, a kâwngruh chuktuah-te a zawi zo va, a khûp te a in khâwng hlawk hlawk ta mai a. Chumi zânah chuan Kaldai Lal Belsazzara chu thah a ni zui ta a ni.

Bible scholar-te chuan Lal Belsazzara hian Zu rui lo ta sela chuan, Hmun Thianghlim (Jerusalem Temple) Bungbel-te kha Zu in nân a hmang kher lo mai thei a, Pathian pawhin a nunna leh a Lalram kha ala zuah sak rih mai an ring a ni. Zu a in mai a ni lova, a Zu rui lungpuam khan Lalpa Bungbel Thianghlim a ti-bawlhlawh a, kha khan Pathian mit-naute a khawih a, Pathian thin a ti-alh a, a Nunna leh a Lalram thlengin a chan phah ta a ni. Zu in chu a pawi lova, Zu ruih sual (hman sual) hi a va pawi em!!!

{::Bible Dictionary: Abihua=he is my father. Ammon=people/son of my people. Aron=teacher/ lofty/ mountain of strength. Belsazzara=master of the treasure. Ela=an oak/ a curse/perjury. Lota=stone/ portion/ destiny. Moab=of his father/ of a people. Nova=repose/ consolation. Nadaba=prince/ free and voluntary gift. Nebukadnezzara= tears and groans of judgment. Zimria=of a people::}

Similar Posts:

• Wine (zu) hi Kristiante hian kan in duh ang em?
• ZU HI SUAL A NI LO, A IN A TE PAWH AN SUAL HEK LO
• Nova’n Anchhia A Lawh Sual Emni? {:Sunday Pual:}
• Bible a zu(wine/uain) lanna te..
• GENESIS Rapthlakna

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, May 12th, 2013 at 6:00 am and is filed under Mizo Society & Culture, Religion, Zu. You can follow any responses to this entry through the RSS 2.0 feed. You can leave a response, or trackback from your own site.