Vawi khat chu Ceneas-a hian Pyrrhus-a hnenah, “Eng nge i tum?” tiin a zawt a. Ani chuan, “Sicily thliarkar hi lak ka tum a ni,” a ti a. Ceneas-a chuan, “Chumi hnuah eng nge i tih ang?” a ti a, ani chuan, “ Africa leh Carthage lak leh ka tum ang,” a ti a.”Chumi hnuah chuan eng nge i tih zel ang,” a ti leh a, ani chuan, “Greek leh Macedonia ka hloh tawh chu lak let leh ka tum ang,” tiin a chhang leh a. Ceneas-a chuan, “Chutiang ram pum pui i hneh hnuah chuan eng nge i tih zel ang?” tiin a zawt leh a. Ani chuan, “Keima ram lak ngeiah ka hahchawl ang a, hnehna hla chu hlim takin ka sa tawh ang,” a ti a. “A nih leh engtin nge i awm zel ang?” tiin a zawt leh a. “Ka lei nun hlen zovin ka thi tawh mai ang chu,” a ti a. Ceneas-a chuan, “Hei hi ka zawhna tawp ber ni tawh rawh se, i thih hnuah khawiah nge i awm ang?” a ti a. Pyrrhus-a chuan, “Ka hre lo,” tiin a chhang a.
Pyrrhus-a ang hian khawvel thila kan tih tur programme chu kan ruahman nasa hle a ni thei e. Naktuka kan tih tur te, nakkuma kan tih tur te, kan dam chhunga mi thiam nih emaw, mi hausa nih emaw chu kan tum ruh hle a ni mai thei. Chutih lai chuan kan thih dawna awm dan tur leh, kan thih hnua kan awm dan tur hi min zawt sela, “Ka hre lo,” kan tih si chuan, chu ngei chu chatuana pawi hlen tur chu a ni ang.
“Nimahsela nunna nei turin ka hnenah in lo kal duh si lo”. Johana 5:39
