mi(sual).com

Naupang te ka nih lai chuan thiante nena kan intlansiaknaah reng reng a hnuhnung berah ka thleng ziah a. Ka tlan chak ve thei lo va. Basketball kan khelh pawhin ka zuan kan ve theih loh avangin harsatna ka tawk ziah a. Ke rek lai a chet theih loh miau avângin zuan leh tlan chu harsa tak a ni. Hei vang hian infiamnaah reng reng thlan chhuah hnuhnun ber ka ni ziah thin.

Ka ke lem vuah avang chuan ka thin hi a rim hlur zel mai a. Mahse, rollerblade ka neih atang chuan ka harsatna chu ka su kiang chho ve zel a ni. Ka pian a dik loh avangin ke lem ka hman a ngai a. Chutiang ke lem chu thla riat mi ka nih atangin ka vuah tan a. Chu chauh chu ni lovin ka kut vei lam kutzungtangte chu an inchar khawm vek avangin an zai a, kutzungtang pariat chauh ka nei ta a. Mi tam tak chuan ke nei lo leh kutzungtang pariat chauh nei chu sikul pangngaia ka kal theih in ring lo mai thei; mahse, ka kal tlat a ni. A tirah chuan skate-a han chuan chu a harsa hle mai, ka tlu deuh reng mai a. Mahse, ka han chuan thiam deuh chinah chuan nuam ka tiin naupang dangte ang bawkin chak takin ka duhna hmun ka thleng ve zung zung mai. Ka zir chhunzawm zel a, ka thiam nal hnu phei chuan ka thiante nena kan intlansiak pawhin chak ber ni lo mah ila a hnuhnung ber chu ka ni ziah tawh bik lo.

Skate chuan chu ka nuam tih ber a nih tak avangin rollerskate hockey team-ah ka tel ve ta a. Kum tluanin kan inkhel a ni ta deuh ber mai. Ka tel tirh chuan awlsam tea vuak goal mai theih turah ka ngai ngawt a. Mahse, a lo ni ngawt lo tawp mai. Chumi kum chuan vawi khat mah ka ti-goal lo! Season chawlh laiin theihtawpin ka inzir ta ngar ngar a, season tharah ka inziak lut ve leh ta ngat a. A tel tur thlanna kan neih zawh chuan a upa deuh zawkte zingah min dah ta a. An lian hlawm viau lehnghal a, huphurhawm tak a ni. Kan han inkhelh lahin ka pawlpuite ngei pawh chuan ka ball khalh lai te chu min rawn laksak zel mai bawk si. Hrehawm ka ti thei hle mai a. Kan inkhelh leh turah chuan ka kal duh ta lo, ban mai ka tum a ni. Mahse, ka nu leh pate leh ka nau chuan bansan lova theihtawpa tan la zui turin min fuih hlawm a, ka tel leh ta a. Kan inkhelh leh chuan a tawp dawn hnaih lamah chuan si khatin kan hneh lo va. Keini lamin si li kan thun laiin anni lam chuan si nga an rawn thun thung a ni. Ka khelhna lam ding lam sirah ball an rawn vaw phei a, goal-ah ka vaw phei a, a lut hlauh mai a. Kan inhneh tawk ta! Ka thiante chuan lawmin min rawn chibai sap sap hlawm a. He infiamna hi theihtawp ka chhuah phawt chuan thiam tak ka ni thei tih ka inhre chhuak ta a. Hei hi goal ka thun hmasak ber a ni. Tunah chuan kum 13 ni tawhin ice hockey leh roller hockey intihsiakna lianah pawh vawi thum ngawt ka khel ve tawh a ni. Ka inkhelh chhung hian vawi eng zat nge goal ka thun tawh pawh ka hre seng tawh lo hial a ni. Hetih rual hian American Amputee Hockey Association-ah ka khel tho bawk a. Heta khelte hi ke lem hmang vek an ni. Ram chhung hmun hrang hrang bakah Canada leh Russia ramah te pawh inkhelin kan kal chhuak a ni. Tun hnai khan Nexed company, skate hockey khelhna hmanraw siamtute chuan an hmanraw tihlar nan min hmangin inkhelh thawmhnaw min tumsak vek a. Heng zawng zawng hi minute hnih lek awm tawha goal khat ka thun avang leh ke lem siam thiam Eric-a vang liau liau a ni.
Eric-a hian eng ang ke lem nge ka mamawh tih min hriatsak vekin chutiang chiah chuan min siamsak thin. Tun hmaa ka ke lem vuahte chu a khawng tlat a; Eric-an a thar min siamsak erawh chu a ke rekah a inthlep ve thei a, kal vel pawh a nuam zaih tawh mai. A khawng chi kha hockey khelh nan a tha a; a inthlep thei hi chu tlan nan te, zuan nan te, tlang lawn nan te leh golf khelh nan te a tangkai thung. Ke lem vuah lote aia ke lem vuah a hlawkna chu inkhelh laia ke ulh leh tliak palh a awm ve lo hi a ni! Ka inkhelh tur azirin ke lem vuah tur pawh ka thlang mai zel! Ke lem hmang na na na chuan chet chhiat pawh ka ngah. Khaw dang team-a ka tel tumin vawi khat chu ka che chhe khawp mai a. Ka khelhpui tam zawk leh an nu leh pate chuan ke lem ka hmang tih hre hek lo, inkhelh laklawh laiin goal-a theihtawpa na a vuak luh tuma ka khelkawm ka vai laiin ka ke lem a’n thlawk maiah! Ka ke chu a goal zawk tep lehnghal! Mipui mak ti chu an reh nghal duk mai a. Khelmual atanga min zawn chhuak turin coach pahnih an rawn tlan lut nghal vat a; pakhatin min kuah chhuak a, pakhatin ka ke bung chu a rawn khai chhuak thung a. Ka inkhelh thuam famkima ka inthuam chuan tuman ke lem ka hmang tih an hre thei lo reng reng a ni. Khelmual ka chhuahsan chiah chuan mipui chuan kut an bengin chang an tum rawih rawih bawk a. Kha thil thleng kha tuman an theihnghilh theih ka ring tawh lo. Ka nuin ka ke chu min vuahpui a, keini pawh chu kan nui nasa hle a ni. Inkhelh zawh chuan a khel tha ber ang maiin min chibai sup sup mai maw le.

Ramtuileiloah ka inngai ngai lo reng reng, ka pian a danglam deuh mai chauh a ni. Kum sarih ka nih atangin vur tleng (skiing) ka ti tan a, ke lem hmang ve dangte nen kumtin ski camp-ah kan kal ziah bawk a. Engtikah emaw chuan Paralympic (pian phunga rualbanlote Olympic ve)-ah pawh ka la tel ve mai thei a ni. Eng pawh ti dawn ila, theihtawp chhuaha ka inzira ka inbuatsaih a ngai tih ka hria. Ka than ang zelin ka ke lem pawh chu siam danglam ve zel a ngai a. Chutiang bawkin thil thar eng emaw han tihpui chhin ve zel pawh ka duh thin. Ni khat pawh mel ruk intlansiakna a ka tel zo chiah hi ka thian pakhat hian, “Nileng lengin khawiah nge i tawm bo daih?” tiin min lo zawt a. Ka kalna ka han hrilh chuan, “Chutiang te chu kei chuan ka tlin ve teuh lo mai!” a ti hial. Eng tikah emaw chuan College tha taka kalin National Hockey Team-ah ka la khel ve ngei ang. Ka thupui chu – ‘tum phawt rawh’ tih hi a ni. I tih chin hma chuan eng mah i hre thiam tak tak lo vang’ tih hi a ni.

Danny Stein

Similar Posts:

• English Golden Generation an chuai
• 2nd Wai Wai Cup tan a ni
• U-21 National-ah Mizoram in final lut
• 2nd Wai Wai Cup a hnuhnawm zel!
• Gunners Laipui vawi 3 a puak

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Wednesday, July 3rd, 2013 at 1:41 pm and is filed under Copy Paste, More than words. You can follow any responses to this entry through the RSS 2.0 feed. You can leave a response, or trackback from your own site.