Mipa naupang kum 8 mi Thomas-a chu naupang sawngnawi ang reng tak anih bakah, a beng hriatna a chak vak lo lehnghal a. A kum rualpuite chu infiamnaah leh Sikul zirna lamah pawh a pha lo ang reng hle a, Thil zirtir a man har thin em avangin, an zirtirtute pawhin an buaipui bakah, an dawhtheihnain a tlin ta thin lova, an hau nasain an vin nasa hle mai thin a ni. Chutia an zirtirtuten deusawh tak taka an hauh fo thin avang chuan, a pawlpuite pawh chuan, an hmusitin an tinawmnah fo thin a, nuihza siam nan te an hmang thin a ni. Nimahsela, miin an hmuhsit leh an cheksawlh nasat poh leh a Nu erawh chuan a hmangaihin a khawngaihna a zual zawk zel emaw tih turin dawhthei takin Tlai Sikul ban hnuah an Chokaah chuan, eirawng bawl pahin a zirtir tang tang thin a, a fapain Sikula a thil tuar thin chi hrang hrang a sawi thin te chu, Khawngaihna leh lainatna mittui nen a lo ngaihthlak sak vek thin a, a fapa chu tawng thlamuanin hmangaih takin a kuah vawng vawng thin a ni.
Tlaikhat phei chu, Thomas-a chuan an Headmaster lehkha a rawn hum haw a. A rilru a chak loh leh thil a man har lutuk avangin, a pawlpuite leh Zirtirtute tan phurrit a siam nasa lutuka hriain, an Headmaster chuan, an Sikula zir thei tawh lo turin a hnawtchhuak a lo ni a. A nu chu a rilru na teh mahse, engmah a sawi lova, an Headmaster demna thu kam khat pawh a chhak chhuak hek lo. A fapa chu a kuah vawng vawng a, ‘A pawi lutuk lem lo ve, thil awmdan a la ziaawm leh mai ang” tiin a fapa chu a hnem a ni. Thomas-a chu, hmangaih leh dawhthei taka zirtir chuan, naupang dang ang thovin a zir ve thei a ni tih chu a ring tlat a, thahnemngai tak leh dawhthei takin amah ngei chuan, in lamah a zirtir chhunzawm ta zel a ni.
A nuin hmangaih leh dawhthei taka a zirtirna chuan, Rah a rawn chhuah tan ta a, Thomas-a chuan, thil thar eng eng emaw siamin a enchhin ta tlut tlut mai a. A tirah chuan, a nuihzatthlakin, thil ropui tak a siam chhuah hmel lem lohva, amaherawhchu, a nu chuan, amahah rinna a nghat tlat a, vawi tam fail mahse, beidawng duh hauh lovin a bei zel a, a hun hnuhnung a lo thlen a, he khawvel a chhuahsan ni a lo thlen meuh chuan, Khawvela ram ropui ber United States of America chuan, amah chawimawi nan leh an ui zia tihlan nan, America ram pumpuiah Minute khat chhung Electric eng zawng zawng an tithim vek a ni.
He Thomas-a hi a rilru chakloh lutuk avanga an headmaster-in Sikul atanga a hnawhchhuah tak ngawt kha a nilovem ni? A pawlpui te pawhin an nuih hluah hluah thin kha a ni lovem ni le? Ni ngei si e. Thomas Alva Edision Light bulb leh Phonograph(Ri(Sound) Record a, ngaihthlak leh theihna lam chi) thiamna ngaihtuah chhuak a, a taka siam chhuaktu ngei chu a nih avangin, chu a thil hmuhchhuah chu Mihringte tana a tangkai em em avangin, a chunga an lawm zia entir nan leh an ngaih ropui zia entir nan, a thihni chuan, America ram pum puiah Minute khat chhung Electric eng zawng zawng an tithim vek a nih chu. Amah hnawtchhuaktu Headmaster te, a pawlpui ho amah hmusita nuihzat thin ho ve kha, America ram pumpuiin Thomas-a an chawimawi lai hian khawiah nge an awm ve a, tu hriat nge an hlawh ve le? Rimawi ngainatute leh Electric eng tangkaizia hretu zawng zawngte tan chuan, mi ngaihsanawm ava han ni chiang tak em.
Pathianin duh taka a siam Mihring mimal tin teah hian, mi nazawng hmuh theih loh, thil tha, mawi leh duhawm hi a in phum vek a ni. Amaherawhchu, hmuh theiha parchhuahtir tur chuan, hmangaih leh dawhthei taka enkawl leh inchhawmdawl erawhchu a ngai thin a ni. Mi tam tak hi, kan enkawl thiam loh leh dik loh avangin, Misual leh mi hnawksakah kan chhuah fo thin a, mi tha leh tangkai tak tak turte pawh, kan enkawl leh treat dan dik loh avangin, engmahloah emaw, mihnawksak leh misualah kan chhuah fo thin a ni. Pathianin duh taka a siam mimal tinte hi, kan duhawmna, tangkaina leh mawina thuruk theuh hi inhmuhchhuah sak tawn theuh zel ang u.
Similar Posts:
- Abraham Lincoln-a Lehkha Thawn
- I Duhlai Hlu Ber Kha…!
- Naupang Zirtir
- Hmangaihna – Naupang ah
- Tunge mawhphur ang!!!
July 14th, 2013 at 8:52 pm
Chhiar ila…
Report this comment
July 14th, 2013 at 10:39 pm
Thomas-a chanchin hi chu ngaihnawm ka ti reng. Hnuk a tiuluh ti tih thei mai alawm le.
Tunlai chhana electrict current tangkaizia hi chu sawi loh law law hian a fiah zaw ber e.
Report this comment
July 15th, 2013 at 5:53 am
Thomas Alva Edison-a chanchin hian Zirtir ropui lutuk a nei a, khawvel lam thilah leh thlarau lam thilah pawh kan fimkhurna turin Pathianin he Miropui chungah hian hetiang thil hi a thlen-tir phal ni berin ka hria! Vawi hnih/khat hlawhchham avang te, thil engemaw-a an zei loh leh thiam loh em avanga mi hi hnualsuat a, hmuhsit ngawt tur a ni lo, tih te, Hlawhchham hi Hlawhtlin nan hman a tul tih te hi ka ngaih pawimawh zual-te an ni.
Tirhkoh Paula pawhin a tihsual tawh kha…
A hming “Thomas Alva Edision” tia ziak hi typing mistake a nih ka ring, Thomas Alva EDISON tih ni zawkin ka hria.
Report this comment
July 15th, 2013 at 7:00 am
https://www.youtube.com/watch?v.....ture=share
Report this comment
July 15th, 2013 at 9:54 am
A ngaihnawm khawp mai.
Edison kha ngaihsanawm viau mahse, Tesla ka ngaisang zawk hlauh thung.
Edison khan thikin tibuai ta chhen lo sela chuan AC mai hmang lovin, wire thlung lova khawvelah electric kan hman theih ka ring ve tlat. A siam tumna hmarua hmangin motor dynamo etc. kan la siam chur chur chu a nih hi le!
Tesla chanchin tawite kalo ziah ve naw naw:
https://misual.life/2010/08/02/tesla/
Report this comment
July 15th, 2013 at 10:17 am
Dawn a tisei mai thlawn e thinlaiah (eh)
Report this comment
July 15th, 2013 at 12:48 pm
A ngaihnawmin a challenging kher mai.
Report this comment
July 15th, 2013 at 6:43 pm
Tunlai chu misual-ah post leh comment a reh ang reng hle mai. “Post lamah tan la thar leh ang aw” han ti viau dawn i la, comment tu an awm si loh chuan, post a lo phurawm teh chiam bik lo mai thei si a, misual.com lovers ho tanlak thar deuh chu kan ngai anih hmel e.
Report this comment
July 15th, 2013 at 7:33 pm
Edison a chanchin ka naupan laia ngaihnawm ti taka ka chhiar kha ka lo mangnghilh nasa tawh mai a. He post hi a ngiahnawm bakah thil tam tak min hriatchhuah thar tir leh a ka lawm hle mai.
Report this comment
July 15th, 2013 at 8:23 pm
Thil chik deuh leh hrechiang lehzual duh te kan lo awm takin:- T.A.Edison-a hi kum 1931 October ni 18 ah a thi a. A tuk thumna october ni 21 kha, electric bulb(Candelescend light) a siam chhuah cham vawi 53 na a lo ni bawk nen, a thil siam chhuah cham lawm nan leh, a thih sunna ni pah fawmin october ni 21, 1931 zan dar 9 leh minute 59 na chiahah America ram pum puia electric bulb eng tih thim theih zawng zawng tithim vek turin Radio leh Newspaper ten an puang zar a. An zawm tha viau reng a ni? Amaherawhchu, electric eng zawng zawng ti thim vek tur ngaih tur erawh a ni lem lo ang. VIP leh emergency thil te chu a awm ve ang chu.
Report this comment
July 15th, 2013 at 9:18 pm
Artui awp keu a tum thu kha a tello pek a nih hi maw le
Report this comment
July 15th, 2013 at 9:27 pm
ti ru.. comment delete rap rap ngai khawp khan inhnial leh luai luai ang u..,.haha..
Post tha tak a ni.
Report this comment
July 16th, 2013 at 3:19 am
Ngaihsan awm khawp mai Thomas’a nu leh amah chu. Ngiahnawm khawp mai.
Report this comment
July 16th, 2013 at 4:13 pm
@Bucko, “a tirah chuan a nuihzatthlakin thil ropui tak a siam chhuah hmel loh khawp mai a” tih khian, a artui awpkeu tum te pawh kha a huam thei ang chu.
@Saint Sammoo, Kan inhrechiang ang reng tawh hlawm lutuk a, kan nick hi thlak vek ila, Phone leh E-mail i/d tharin PP dang daih hmangin in Register thar leh vek ta ila, kan zia deuh ang em aw??? Hriatchian tak te hnial pung pung leh tawngkam dengkhawng tak hman hi a hrehawm kan ti hlawm te pawh a niang e?
Report this comment
July 16th, 2013 at 10:29 pm
A naupan laia artui awpkeu tumtu kha a ni miau a.hehe
A thil hmuhchhuahte hi kan la hmang tangkai zel chu a nih si hi maw! Electric bulb tak erawh hi chu a hmu chhuak hmasa bertu chu a ni chuang lo na a, ama siam chhuah electric bulb erawh hi chu a tangkai chi leh mipui nawlpui hman theih tura duan leh siam a ni thung a, a tangkai ber thung lawi si a ni. Kan department event ‘Pragnya’-a kan tshirt hnunga inziak, “We are electrical engineers, we are here because of Edison’s fault” tih kha ka hre chhuak zawk mai.
Report this comment
July 17th, 2013 at 6:42 pm
amah ka ngaihsan tluk zet in a NU khi ngaisang nia…(y)
Report this comment
July 13th, 2014 at 9:05 pm
Fields Reverse Reviews
America ram minute khat chhung tithim thei tu Mi ropui chu. | mi(sual).com
Report this comment
June 30th, 2015 at 3:40 pm
curso control de plagas barcelona
America ram minute khat chhung tithim thei tu Mi ropui chu. | mi(sual).com
Report this comment