mi(sual).com

AUKHAWK LASI
************
Ngaizel Aukhawk Lasi chanchin leh a behbawm.

Aukhawk an tih hi thangthar hre phalo kan tam viau tawh in a rinawm a. Sawmi Ngaizel Petrol Pump thlenphei hma kawng chhak lam khampang saw a ni a, hmanlai chuan han au hian a khawk ruah ruah thin a, chuvanga aukhawk ti a ni a. Mahse Ngaizel a lung an lak thin lai khan a ti khawk tu ber lai a kha an hal chhe ta daih a tunah chuan a khawk thei ta lo a ni, a uiawm khawp mai. A khawk theih hun lai hi kan hre ve pha a, chawlhni tlai vel hian kan va phei a, kan han au vak a vawi li vawi nga te hi chiang deuh deuh hian a khawk nawn awn awn mai thin a ni. A engemaw rapthlak duh ve phian mai lehnghal. Tunhma keini hriat ve phak hma, hemi Ngaizel kawng a motor kawng a la tlang hma daih hian helai Ngaizel aukhawk an tih velah hian Lasi an awm thin a sawi a ni a. Ngaizel an tihnachhan tak hi ‘Ngai’ kung hi a tam thin vang a ni a, tunah pawh hmuh tur a la awm zeuh zeuh saw.

Tichuan kan thupui lamah lo lut leh tawh ila, hmanlai deuh chuan Ngaizel kham pheiah hian Lasi hmu te leh lasi thawm hria te pawh kha an lo awm fo ni in rual u deuh te chuan an sawi tlat mai. Zan tlai deuh a kawng kal te hian khampang chhaklampanga hmeichhe nui ri awr awr te, tin, inbe mawl mawlh ri ang te hi an hre thin a. Mahni a kawngkal chhaklam khampang atanga an hming a an lo auh tak lawng lawng te pawh an awm fo ni in an sawi bawk. Thenkhat te phei chuan umphak theih chuiah si lo a an hma lama hmeichhe kal te an hmuh thin bakah khampang ngai kunga nula thu te pawh an hmu thin ni in an sawi bawk. Tin, Ngaizel khampang velah hian tau meichher chhi te pawh kha an hmu nasa hle thin a ni awm e.

Ngaizel phei khi tunah chuan in a awm khat deuh ta vek mai a. Kan hriat ve phak chinah pawh in saktheina awm ang turah kan ngai ngai lo kha ni ni ve thin a. Mizote hi khampang a in sak hi kan huai riau mai a, ‘kham huai’ hi kan ni hi a ni ngawt tawh mai a. Tunhma motor kawng te a la tlang hma kha chuan Ngaizel phei vel hi chu la ngaw ve tak mai kha a ni a, heng Lasi leh ramhuai tih vel lam pawh hi lo awm ve pawh ni ta se a awmlohna pawh kei chuan ka hre mang hauh lo mai.

Ngaizel phei chungchang han sawi takah chuan mak ve deuh mai chu kan tlangval chhuah chhoh tirh lam hian kan veng kawn phei velah hian zan lamah hian kawngdung a thut hi kan hrat ve viau thin a. Khang hunlai kha chuan nula tlangval ‘chance’ nei duh te hian Ngaizel hmun fal lam hi an pan chawk thin a, enthlak tur pawh hi an awm ve deuh reng thin a ni. Zankhat chu kan thianho hian kawnah kan thu a, zan dar 7:00 bawr velah hian mipa leh hmeichhia scooter a inphur hi Ngaizel lam pan hian an rawn tlan phei a, kan lo chhaih fiam dar dar nghe nghe a, kan ngaihsak zui lem hlei lova. A hnu deuh fe ah chuan an pahnih chuan hlau em em mai hian Ngaizel lam atang chuan ke hian an rawn tlanchhe phei a, an scooter pawh chu an rawn tlansan daih mai a. Kan bul an rawn thlen chuan min lo pui te u hi an rawn ti tawl mai a. Chanchin kan han zawh chian chuan khatia hmun fal lam an pan kha Lungpui-chawlhhmun an tih thin bulah sawn kawng thlanglamah tawm fal an tum chu an scooter an stand zo chiah tih chuan kawng thlang atang chuan mihring ang tak mihring nisi lo meng sen rum mai hmul dur mai hi a rawn vak chhuak chu an lo hmu chu lo ni in. An hlau lutuk chuan an scooter pawh chu la hman tawh lo in an rawn tlanchhiat san a ke in an rawn tlanchhe thleng zak chu lo ni in. Anmahni an let leh ngam tawh bawk si lova an scooter chu kan va lak sak ta ringawt a. Engmah phei chu kan va hmu ve ta chuang lo a. Hemi zan hian thla a eng hle nghe nghe a. He an thil hmuh hi eng tak chu ni ang maw.

Ngaizel Aukhawk Lasi chanchin hi ka hre thui vak lo khawp mai a. Pu Lalzuithanga ziah ami lah kha thawnthu anga tan a a ziah anih avangin han rinchhan chi a ni chiah mang si lova, mahse helai Aizawl chhung ngei a hetiang lam thil sawi awm ve kan neih ve chhun tlemte te zing amia nih avangin tangthar(han ti ve leh chhawng ila) a la hrelo te tana han chhawp chhuah ve hrim hrim ka duh avangin ka hriat ang chhun chhun ka rawn ziak ve a ni e.

*A thlala ami hi tunhma Aukhawk an tihna lai zawn thin chu a ni a, mahse a ti khawk tu ber erawh a awm ta lo. (Keima lak a ni e)

BigDaddy Hmahmatea

Kulikawn