Zanah kawlphetha eng a awm dawn lo tih hre rengin chhung ten an han thukru tawk tawk chung paw’n sathau khawvar kha a khuangcher bo leh tawp zel kha a ni a. Keini lahin zanah eng a awm chuan lehkha kan zir ang tih hlauh vang pawh ni lem lo-in kan tawlh-lir (?) tlan chakna tura oil tha ber a nih avang khan kan ru lo thei si lo a; dil chuan an lo phal lo ve chhen bawk si a.
Thingphek banrek tia, feet thum vela seiah khan thut chhan turin mawng leng tawk velin thingphel kan han chhu bet a, a hma lerah lah a ‘steering’ ni awm fahranin ke rah chhan tur kan han vaw bet bawk a. Perek duh anga tha leh ngil a awm si lo. Rem leh rem lovin a thut chhan chu kan kheng bei thei hram a, perek a lo kawi a, perek dang awm tawh hek lo – a kawih ang angin kan chhu bet lui ta thin kha a ni a. Mahse kan kekawr mawng tai thlertu tur a ni tih hre reng mah i la kan mawng-ti em a tai thler loh chuan kan duh tawk mai thin kha a ni a.
Tlai sikul ban hnua Sikul muala a tawlh chak pawl leh intithei pawl nih duh chuan zing lamah hma tawka thawh a ngai tih chu tumah inhrilh kan ngai lo. Khua a var rualin kan tho them them a, chhungte mombati kan ru chhuak a, kawmhnuaiah, bal tinreng hawl liamna hmun, arpui tui lai ten chhun lama an duhtawka an talna hmunah ngei mai chuan kan ‘tawlhpahrit’ intung tha hle hle chu kan han kuai zang thal thuai a, a hnuai lam zawngah chuan mombati tlawn khat chu kan han tat ral vek a, tlai lama hruk tlet/nal turin ni sa hnuaiah kan hnutchhiah a, sikul kan kai san ta thin.Tlai lamah chuan sikul chu kan han bang te cheng a, kan uniform chu kan phelh hman tawk a ni ber mai, tin, chhun lama kan ril a tam em avanga kan chawthing chaknate pawh chuan min kian san lo thei lo – kan tawlhpahrit tawlh chakna khan pan hnai la ang mai khan min tur et et tawh hek. Kan tawlhpahrit hruk nal chu kan hna hmasa ber a ni a, kan mitthla-te chuan veng mawnga sikul mual awih zet bak a hmu tawh meuh lo. Sikul mual track kan han thlen ve meuh chuan a veng hnai zawk te chuan awmhmun an lo khuar nghet tawh hle a, mahse tawlhpahrit nei tha pawl ka nih avang khan min zah der ve em em a, tawlh chak viau mahse ka tawlhpahrit nena ka han leu zik zek kha an lo hmu chak ngang a ni ang a kotlang-a thuthmun rem chu an thlang ta zawk a, tichuan kei chu an hmuhnawm thlir ka lo ni ta a.
Mahse lawm a la kim thei lo; kan thenawmpa Valtea tawlhpahrit aiin ka tawlhpahrit chu a ‘class’ a hniam zawk tlat. Mahse ani kha chu tluk theih a ni lo, a tawlhpahrit kha chartin (4×3) bung a ni a, a hnuai lah a tle tha-in a mam tha a, a tawlh chak hmel bik em em bawk a, awt lo kha an awm meuh lo a ni e.
Duh tawkin kan han tawlh a, a chang leh kan inel a, pakhatna ni vek lo mah i la a thiam pawl chu ka ni ve ziah chuan ka inhria. A tlai telh telh a, kan tawlh tan dawn chauh emaw tih laiin haw a lo hun leh ta thin a, in lam pana tawlhpahrit han put haw kha chu thil thlakhlehawm tak chu a va ni lo tak em! Tlai tin kekawr mawng pakhat tal tet ziah ang a ni a, ka kekawr neih ho kha a mawng him reng reng a awm lo. Chhungte thinrim hmel hmuh kha phung hmuh ang zetin a hrehawm a, tawlhpahrit phei kha chu in thlenpui hma-in kawmhnuaiah emaw thuhruk nge ngei a ngai, chu ti lo zawng chhung ten an sat chhe vek dawn si a.
A mak ngawt mai! Chhungte’n an phal lo tih hre reng chungin tawlhpahrit-a tawlh kha kan bansan thei thak lo, kan ‘addict’ ve tlat. Mahse addict rau rau-ah tunlai hri tha lo addict ai chuan a tha zawk turah ka’n ngai ringawt pek a. Rukruk-te pawh kha kan ching lo a ni bik hauh lo, mahse kan thil ruk kha mombati vel te kha a ni a, chu pawh a tlawn tha pangngai chu vang tak a ni a, chhit bang tih hriat reng a bungte kha a nia kan ruk ve chu. Kan rukruk avanga chhungte ngaihdamna pawh kha tul kan ti lem lo nge keimahni kan inngaidam zawk ni ang han inthiamlohna em em lah kha a awm der si lo.
A enga pawh chu lo ni se, ‘tawlhpahrit’ khan eng kawng hawi zawng pawhin suahsual rawng bawl chakna a hring chhuak hauh lo. Mahse thenawmpa Valtea tawlhpahrit ka awt lutuk avanga ‘Chartin (4×3) bungin ka la siam ve dawn chiang lutuk’ ti a ka insehruh fan fanna erawh khawvel changkanna-in min mangnghilh tir ta a ni ang vawiin ni thleng hian ka siam ta lo chu a nih hi.
February 1st, 2014 at 12:27 am
Naupan lai min tihrechhuak uai uai alawm le. I ziak ngaihnawm khawp mai.
Report this comment
February 1st, 2014 at 12:52 pm
A ngaihnawm hle mai.
Kan kawmchhak huanah kan tawlh thin a, kekawr mawng a hek duh khawp mai. A hnulam phei kha chuan kan uar ta mah mah a, ka pi balhla kung kan sat a, hmawlh kan chhun tlang, chumi a chuangte chuan kan tawlh ta thin a, chhungte ka ti thinrim thin ngei mai. Kan tawlhpahrit tawlh mek lain chemte chu changelah vawm bur ka tum, a phek zawngin a fuh, a rawn let leh ka ngalah a bur chat. Tun thlengin ala ser. Hairehai
Report this comment
February 1st, 2014 at 6:06 pm
Panlai nun min hriat chhuahtir, i ziak ngaihnawm thiam hle bawk e
‘Chartin (4×3) bung chuan la siam ve ngei turin duhsakna ka hlan a che 
Report this comment
February 1st, 2014 at 10:41 pm
#2) Hahaha, ngala chemte bur vâ chu hit lem lo khawp mai.
#3) Chartin bung a vang em a lawm le khatih hun lai kha chuan.
Report this comment
February 4th, 2014 at 7:02 pm
Lunglenthlak hle mai. P/S kal laiin form kekawr kha bul a ni thin sia, tawlhpahrit kan tawlh avanga kekawr kn a’n tet vek mai kha zawng pawnfen chhing kan feng haw hi a ni ringawt zel.
Chartin bung hi chuan ka tawlh ve ngai loa, changel kawr in lei kha tuiin kan ti hnawng ngeia, a nal tha thei kher mai.
Tuikawhnain lungrem a tawlh kha a nuam viau thin bawk. Hei erawh chetsual a zing deuh thung.
Report this comment
February 5th, 2014 at 11:28 am
Ka lung a leng.
Report this comment