Lal Isua Thlêmna Tawh Dân Record Hi Ava In-Ang Lo Ve?

October 24th, 2014 11:04 am by Dr John

1. Thuhmahruai
Matthaia 4:4-5 leh Luka 4:5-12-ah Lal Isua thlêma a awm thu kan hmu a. Thlêmna a tawh chhoh dân indawt (order of temptation)-ah hian, Matthaia chuan Biak In chhip aţanga zuangthla tura Thlêmna 2-na, Khawvel lalram Thlêmna 3-na angin a record a. Dr. Luka thung chuan, Khawvel lalram Thlêmna 2-na, Biak In chhip aţanga zuangthla tura Thlêmna 3-na angin a record thung si!? Engtia sawi rem tur nge ni ang?

2. Matthaia Leh Dr. Luka Record Dân A In-Ang Lo
A chunga Bible châng kan sawifiah tur ang chi khi hmun dangah pawh a awm nual a. Theipui kung hauhlum chungchang (Mt.21:18-19, Mk.11:12-21) leh Rawngbawlnaa Tiang ken chungchang (Mk.6:8, Mt.10:10, Lk.9:30) te pawh he thu nen hian case in-ang an ni. Nakina kan la sawi tur tho a nih avangin dah ţha rih mai ila. Helai Bible thu-ah hian inkalh emaw, dik lo emaw a awm lo tih erawhchu hre hmasa ber ila. Bible bu hrang hrangte hi a Ziaktu an hrang ang bawkin, an Ziak dân kalhmang leh an Ziak duh dân-te, an uar duh lai-te a hrang vek a ni tih hre reng ila.

3. Matthaia Record Dân
Matthaia 4:5-ah chuan “Chu mi zawhah chuan (Greek tote. English ‘then’)…” tiin thlêmna 2-na a tawh dawnin a inziak a. Biak Inchhip zum aţanga zuangthla tura a thlêmna a hlawhchham hnu chuan, Diabolan a thlêmna 3-naa a thlêmdân chu hetiang hian a inziak leh a, “Tin, Diabola chuan tlângsâng takah a hruai leh a…(Greek palin. English ‘again’)” tiin a inziak a ni.

Heng ţawngkam 2 (adverbs – chu mi zawhah chuan, a hruai leh a) a hman-te hian Matthaia ziak lan duh leh sawi uar duh lai chu a rawn tichiang ta nghal a. Matthaia hian thilthleng indawt dân (order of events) a ngai pawimawh hle a, thilthleng chanchin lam mai piah lamah, thil thleng chu a indawt dân dik tak angin a rawn sawi tihna a ni nghal a ni.

4. Dr. Luka Record Dân
Dr. Luka erawhchuan, a chunga kan tarlan thlêmna 2-na khawvel lalram thlêmna inţan dawnah khian, “Tin,” (Greek kai. English and) tih ţawngkam mâwlmang tak leh “Tin,” (Greek de. English but/then) tih ţawngkam pangngai bawk a hmang a ni. He thil aţanga lang chiang chu, Dr. Luka hian thilthleng indawt dân (order of events) lam a ngai pawimawh vak lova, thilthleng chanchin chiang taka sawi leh tarlan chu a tum ber a ni tih a lang chiang hle a ni.

Greek kai leh de tih lai tak hi Mizo Bible-ah chuan “Tin,” a inti vek mai a! English-ah chuan and leh then a hmang thung a, English hian a ţawngbul lam hi a hnaih (phawk) deuh mai thei.

5. Matthaia Leh Dr. Luka-te Ngaih Pawimawh A In-Ang Lo
Hemi chungchang tihchian nan Dr. Luka ziak aţang ngei hian lachhuak leh nghe nghe ila. Dr. Luka hian Lal Isua rawngbawlnaa thilthlen dân indawt dik tak (order of events in Jesus’ ministry) lam hi a ngaih pawimawh loh-zia a lanna chu Luka 4:16-30 ah Nazareth khua, a seilenna khuaa Lal Isua hnawn thu kan hmu a. Lal Isua ngeiin “Kapernaum khuaa thilmak a tih thu” Nazareth khuaa miten an sawi chu a sawi chhuak a (v.23).

Mahse, Kapernaum khua a tlawh thu hi Luka 4:31-37-ah a inziak chhunzawm ta chauh a ni tih kan hmu! Hemi awmzia chu Nazareth khuaa a lo luh hma hian Kapernaum khua hi Lal Isuan a lo tlawh daih tawh a, thilmak pawh a lo ti daih tawh tihna a ni. Chutihlaiin, Dr. Luka chuan Nazareth khuaa Lal Isua a lo kalin Kapernaum a tlawh thu hi a sawi chauh si a ni!

Hei hian, Dr. Luka thil record-ah hian thil thlen dân indawt (order of events) aiin ‘thilthleng chanchin’ hi a ngaih pawimawh ber a ni tih a rawn nemnghet leh a ni. Chuvangin, Bible Scholar ţhenkhat phei chuan Dr. Luka hi chuan Lal Isua chanchin leh rawngbawlna a record-ah reng reng hian a ngaih pawimawh apiang a ziak hmasa zel niin an ngai hial nghe nghe a ni.

7 Responses to “Lal Isua Thlêmna Tawh Dân Record Hi Ava In-Ang Lo Ve?”

1
TheHumanBot Says:
October 24th, 2014 at 11:04 am
Draft a awm nen hian a va in ang ve?

Report this comment
2
Bucko Says:
October 24th, 2014 at 6:40 pm
A nih duh hmel e///…

Report this comment
3
PKfanai Says:
October 24th, 2014 at 10:55 pm
A tha thin e. Setanan Lal Isua bawkkhupa chibai buk tura a thlem hi, a ho viauin a lang naa, ka nunin fiah takin a tawng vein ka hria a, Mi ten tirawh an tih vang ni hauh lova, mahnin kan mamawh lutuk avang leh, kan mamawh ngawih ngawih avanga bawkkhupa Chibai inbuk(tawngtai)hi a lo namen lo khawp mai, Tlawm tawpkhawkna a niin ka hria a, Pathian thinlung pawh kar chetin a awm thinin ka hria. Post siam ka la tum ang.

Report this comment
4
chhana Says:
October 25th, 2014 at 2:39 pm
In chhui peih hle mai. A lawmawm e.

Report this comment
5
Sihtea Says:
October 26th, 2014 at 7:19 am
Thil ichik peih hlemai.

Report this comment
6
TheHumanBot Says:
October 29th, 2014 at 12:01 pm
Post tupa, tun pending a awm mek “Isua Thlahtu Davida Hi Tu Davida Ber Kha Nge? {Sunday Pual}” nen hian a va in ang teuh ve? Han sawifiah please

Report this comment
7
Dr John Says:
November 17th, 2014 at 4:49 pm
#6 TheHumanBot, Tun hnai Sept-Oct. 2014 chhung khan Post 3 ka Submit a. Thu/Thil In-ang lo vek an ni e:-

(1). Tu ber nge Lal Isua hmu tura lo kal? (Published on Sept.7, 2014).

(2). Lal Isua Thlemna Tawh Dan hi ava in-ang lo ve? (Published on Oct.24, 2014),

(3). Isua Thlahtu Davida hi Tu Davida Ber kha nge? (Submitted on Oct.24, 2014, Stats=PENDING)

Ka rawn Chhang har deuh che a, min ngaidam hram dawn nia.

Report this comment