mi(sual).com

Vai thingpuidawr a thingpui paw ang ngaka fur tui nu pawh a lo fim tha ta hle, tih hun vel September thla chawhnu lam hi, Aiawt chiah leh Chakai Meichher chhit hun a ni thin a.

High School kan kal lai vel, Kan taksa leh kan aw a lo danglam tan a, rilru puthmang pawh a lo danglam tan tirh lai bawr vel, keini Mizoten ‘Rawlthar’ kan tih, Sap hovin, Teenagers emaw, Adolescence an tih hun lai vel khan kan hrat ve hle thin a ni.

Tlai dar 3 ban velehah kan inpuahchah nghal sawk sawk a, Thil tul hrang hrang kan inbuatsaih a, Chakai thlem chhuahna tur leh man an awlsam na tur atan buhfai emaw Vaimim char emaw kan kang hmui a, Aiipah kan dah a.

Meichher chhit tih hming a pu na a, Tunhmaa Mauro meichher nen a an chhit ang ni lovin, Khawnvartui leh pawnchhe hmang a Bati(meichher) kan siam hmang a chhit ani deuh ber tawh a. Mau bati (meichher) hi, In a siam sa ai chuan, Bottle a ken a, rama siamchawp mai te pawh kan ching thin. Tin, tlem a rual u deuh leh Patling deuh ten an chhit chuan, Bawng pumpui te pawh hi keng ila, Lui hnarah han dah ila Chakai chu a rimah an lo chhuak sup sup thin a ni.

Ka thiante 2 kei aia rual u deuh hlek leh lo chhit fo tawh te chuan min sawm ve a, La chhit ve ngai hek lo, a blind theih khawp mai. Mahse, engkim an ngaihtuah zung zung a, Buhfaite kan kang ve a, Bawng pumpui tlem a zawng kan keng ve bawk a,Tin, Khawnvartui plastic bottle 2 in kan keng a, Kan chhuak ta a ni.

Kan chhit tur Lui kan han thlen chuan, Mau kan sat a, chawng ang deuh kan siam a, chutah chuan Khawnvartui chu kan thun ta a, chu chu Puanchhia tumtelin kan hnawh phui leh tlat a. Tin, Kan Sa pumpui ken kha te tak te tein kan chan sawm a, chumi leia vih nghehna turin hmawlh kan suih zum nual bawk a ni.

Tichuan, Lui chu a hnar lam atangin kan zawh thla a, a khat tawkin, Chakai man awlsamna lai turah kan buhfai leh vaimim char kan hmui chu kan phul zeuh zeuh a, Bawng pumpui pawh chu hmawlh zum suihin leiah kan vit bur zeuh zeuh bawk a. Chakai vakchhuak 4/5 vel chu kan man a ni.

Tichuan, Lui mawng lam kan duh tawk chinah chuan kan chawl hahdam a, khua kan nghak thim ta a. Khua a lo thim chuan, Kan Meicher(bati) siam chu kan han keng letling vang vang a, Tichuan, a hnawhna Puanchhe tumtel kha khawnvartuiin a chiah huh hnuah Lighter-in kan hal alh ta a ni. (Thianzaho Chakai meichher chhit ve pawh, an meichher hal alh nan Lens (Ni-no) hi an keng ve ngawt mai a, Ni tlak hnuah a lo hman theih awzawng mai silova, an buai awm teh a sin-pk).

Tichuan le, Lui dung chu kan zawh chho leh ta a. Zan alo thim tawh a, Chakaite pawh chaw zawng turin an lo chhuak tan ta a, Tin, kan Tawktarh phul ho rim khan a ko chhuak ve reng reng bawk a, thiante 2 chuan an man chho ta mawlh mawlh mai a. Kei kha, a zeilo deuh ber ka ni bawk a, Aiip kengah ka tang ta deuh a.

Ka hmuh chhun chun ka man ve pah tho bawk a ni. Kan thianpa chuan Aiawt a lo chiah chu lo niin, Lung intiangkhawm mai mai amaw ka tih kha a han hai a, Aiawt a phawrhchhuak a, a chhungah chuan, Vaimim rawh hmui a lo awm thin a, awt khatah chuan Chakai lian tak tak ¾ lai te a lo tla/awm thin a, a phawrhchhuah hnuah uluk takin a dah leh a, Lung chuan a chhilh leh thin a ni.

A tlangpuiin, buhfai/vaimim kan phulna laiah chuan an lo awm deuh ngei zel a, Tin, Sa pumpui kan dahna lai velah phei chuan an lo bawr deuh laih thin a ni. Kan thiana lah chuan fiamthu a thawh pah a, “A, helaiah chuan, Crusade an lo nei ve anih hi! Tu ber hi nge an Speaker ni ang aw?” te hi a han ti vel thin a, a hlimawm duh hle. Lui kan han zawh chhuah leh meuh chuan, kan Aiip(bag) pathumte pawh an puar nalh tawh a, an khin nalh tawh mai a ni. Tichuan, hlawhtling inti takin kan haw leh ta a.

Khawchhung kan han lut a, Sipai Camp kan thlen dawn chiah chuan, TorchLight eng zet mai hian ka mit takah a rawn en ta sawr mai a, ka lo hmu lawk si lova, ka phu deuh zawk nghe nghe a. A entu hmuh theih siloh chuan Silai kua erawhchu ka hmuchiang kher mai.

Sipai ho an lo ni a, chutiang a zan dar 9/10 vel a, thim thama ramhnuai atanga lo lut ta chu min ringhlel hi a lo ni a (Peace Accord sign hma kha a ni a, bakah, Kan meichher kan timit tawh a ni.-pk). Hindiin thil min zawt a, Mizorama seilian Rawlthar dang ang bawkin, a mik a mak kan hre si lo.

Kan ip puar luah mai chu an ringhlel ta a. Kan han hawng a, an niin hnai tawkah an lo bih a, Aikam lian tawk tak mai an lo phar huang huang mai si a, an chek hlak a, an nello khawp mai. Tichuan, Tualchhungmi kanni tih an hrethiam ve ta mai a, min kaltir ve ta mai a ni.

In kan han thleng a, kan han bunchhuak chu a lo tam kher mai. Kan han insem ta a, A tuk zinga Aikam bawppui lian tak tak leh Awt a tla thau tak tak han ei mai chu, a va tui em! Chawbar a lian duh khawp mai. Aw le, kan zingah Aiawt chiah thin emaw, Chakai meichher chhit thin emaw kan awm em?

Arunachal-ah hian, an lo ei ngai vak lova, zan lama chhit phei chu an ti ngailo hrim hrim a, kan man hnem thei ru ra mai. Mahse, Mizorama Aikam thau tak ang kha chuan a tui lem lo deuh.

Similar Posts:

• Chakai Meichher Chhit leh Khuai Lak
• Panlai Nun – Furkhua leh kan nun
• Hun awl atan hmun awl
• Chakai
• Khuangchera Puk

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Friday, September 16th, 2011 at 1:02 pm and is filed under Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.