September, 2012 | mi(sual).com

Archive for September, 2012

Hmeichhe naupang saprama thawn bo chungchangah fir thehlut.. – Vanneihthanga Vanchhawng@SPECIAL REPORT

Thursday, September 27th, 2012

Facebook ah tam tak chuan kan hmu thovin ka ring a, mahse tam tak FaceBook ngailo an awm tih ka hria. Tin, he thil hi ka ngai pawimawh in a reh leh mai ang tih ka hlau em a ka rawn paste tawp e.

Source: FB Special Report

26th September : Naupang Adoption chungchangah nimin khan Aizawl PS-ah FIR thehluh a ni a, Police te chuan case hi file nghal lovin an zir chiang phawt dawn niin an sawi.

Champhai Rahsi venga hmeichhe naupang pahnih Lalruatmawii (Lalbawihi ti koh) kum 11 d/o Ralkapthanga leh Chhunglawmzuali kum 3 d/o Ramchhuankimi, Champhai Vengsang Project Veng te chu kum 2001 October ni 15 khan Pu C Sangchia Aizawl Zarkawt veng kaltlangin ramdangah thawn an ni a, An puitlin hnuah an chhungte nena in be leh thei tura hrilh an nihna chu, tunah kum 22 mi an nih thlengin an chin hriat zuina a awm tak loh avangin Lalruatmawii pa Ralkapthanga hian nimin khan Aizawl Police Station-ah a fanu chin hriat duhin FIR a thehlut ta a ni.

Lalbawihi pa Ralkapthanga hnen atanga thudawn danin a fanu Lalruatmawii hian Pu C Sangchia’n sap ramah naupang a thawn thin tih engtin emaw alo hria a. Sap rama kal a chak ve avangin Sangchia hi an zawt chiang ta niin a sawi. Pu Sangchia chuan an kal tir dan tur hetiang hian a hrilh niin a sawi “Sap ramah lehkha an lo zirtir ang a, an duh zawng mi an nih chuan a enkawltute chhungkua hian an ro pawh an khawm tir ang a. An puitlin hnuah erawh chuan an duh leh Mizoram-ah an haw leh thei ang. Kum an tlin hma chuan nu leh pate tan biak pawh phal an ni lo a, biak pawh an phal lohna chhan hi nu leh pa tam takin an fate an be lungleng a, hei hi an remti lo a ni” tiin a hrilh niin a sawi.

(more…)

Posted in Copy Paste, Mizoram, News | 29 Comments »

Mam mam ei puk puk

Thursday, September 27th, 2012

Karimjanj hi Mizote zingah chuan a mikhual lem lo, Mizorama vai (a bikin Mistiri) zawng zawng deuh tho hi khawi atanga lo kal nge i nih tih ila, Karimjanj an ti zel mai a nih hi maw. He khawpui ropui tak tlawh chanchin hi ropui tak a ziah tur ka hre hran lo. Buh hawp ka ei thu hi kan sep rawtui ve ang e.

Tun tum chu puanthuah khai lai tlangval mah ni ila rango zawng ah pawh ka in chhiar em em lo. Hmanah pawh ka sawi tawh, ka thianpa chhiahkhawntu (IRS) tlangval kha, Assam Second Capital Silchar atang khan Bangladesh ramri dep, Karimjanj ah an sawn a. A office thar te ka lo hmuh pui ve loh vangin ka zuk tlawh ve a ni ber a.

Ka mikhualna pa, ka thlenin pa hi hriselna ngaipawimawh tak a ni a. Hriselna a ngaipawimawh ka ti takna a, hrisel loh ai hian dulkiar hi a hlau zawk niin ka hria. Dulkiar loh a ngaipawimawh a ni zawk mah chu. Chaw eipui mawlh hian ka ning thin. Chaw eikham te hian a thu mai duh der lova, a vei sek zel a. Chaw ei kham puar laia khawlum deuh hnuaia current awm loh zan phei chuan ninawm tak a ni. Kan Pi Rii chuan chaw ei kham hian thingthit tur a ti tiin chang chuan a thingthi bawk thin a. Mahse, dulkiar hlauva, a vei tawn sek hnu hian a duh chuan a mutthlu leh thler thler thei tho sia..buaithlak tak a ni.

(more…)

Posted in Whatever | 21 Comments »

Mim Kût ‘zêldin thu bâwl’

Thursday, September 27th, 2012

Nimin (25^th Sept., 2012) khan Archive Hall, Aizawlah Mim Kût hman a ni a. Art & Culture Minister PC Zoramsangliana’n a hmanpui. Minister chuan ‘Mim Kût’ hi Mizote Kristian an nih hma lam thil a nih thu sawiin “Tûn hnaiteah hian tuten emaw Mim Kût hman an rawn thar thawh leh chiam mai a, a mak ang reng hle,” a ti. Hmânlaia Mizo piputen mitthi leh Mim Kût an hman dân chu zêldin thu bâwl a ni a, chûngte chu Mizoram Kristianna a luh hnu-ah ûmbo a nih thu a sawi a. “Mim Kût hi kum tam tak kan hmang tawh lo va, a chhan lian ber chu kan sakhua kan thlâk tâk vang a ni,” a ti.

“Kan Kristianna nêna inmil leh kal dùn thei apiangte uarin chhawm nung ila kan tih mêk laiin, Kristianna tiṭhuanawp leh nêk zawnga kal hi thil ṭha niin a lang lo,” a ti a. “Kan sakhaw vawn lai nêna inmil zêlin kan culture kan her rem tùr a ni… Hnam nunphung leh ziarâng te hi sakhua nên a inmil zêl tùr a ni,” a ti. Kristianna nêna inmila culture thlifim tùrin kalkhawmte a chah bawk.

Mim Kût lo chhuahna: Mim Kût lo chhuah dàn history ziaktuten an ziah dàn tlângpuiah chuan, Tlingi leh Ngama, Nupa induh leh inkawp rem tak chu, vanduaithlâk takin Tlingi chu a thi ta hlauh mai a, Ngama chu a lunglêng thei êm êm a. A mumangah ‘zêl angin’ mitthi khuaah a zuk kal a, Tlingi chu chêr leh dawl dâng êm êmin a zuk hmu a, chuti anga a awm chhan a zawh chuan Tlingi chuan, ei tùr ṭha a awm loh avanga an ei a chhiat thute lo hrilhin, an nupaa loa an thlai chin, thlai thar ei a châk thute a lo hrilh a. Ngama a lo harh leh hnu chuan a mumanga a nupui thusawi kha hre rengin loa thlai thar ṭha ber berte chu a nupui Tlingi tân chuan a thlai chhiah ta a.

(more…)

Posted in Mizo Society & Culture, Opinion | 38 Comments »

CFL Hmingthanga – Ka thian ngaihawm

Wednesday, September 26th, 2012

Posted in Mizo Society & Culture, Mizoram, Music and lyrics | 7 Comments »

Panlai Nun – Pawl Li Exam

Wednesday, September 26th, 2012

(Vangpui hun nuam, van boruak thiang tak leh ni eng mawi tak mai a lo en chang hian; nunhlui ngaiin chhuihthangvala’n lunglen puan ang ban har ka ti… )

Suihlung a leng, luaithli ka nul…
An hril, an sak, D zun ngaih vang erawh a ni der si lo! Lungleng vawng vawng thei tura Khuanu’n min siam hi a lawmawm rualin, ngaihtur ber hre lova khawhar lenglen ve tawp erawh hrehawm chang a awm fo. Tun tuma ka suihlunglen erawh kan vangkhua leh chhungkua, then-leh-rual te ngaih vanga suihlungleng, luaithli ka nul tak hial thu a ni.

Kum tawp exam
Ka sawi fo tawh ang khan, kan khua chu thingtlang khua, tlang zawmpui neih loh lutuk avanga lirtheiin a tlawhpawh loh, Mizo lalin an awplaia khaw him ve tak ni si a ni. Hun lo kal zelin, khawsak changkang duh avangin mi tam tak te’n an pemsan pheuh pheuh a nih avangin, pawl li exam tur paw’n kan khaw thenawmah kal a ngai a ni.

Tin, heti hi a ni a. Ram lama tang thei tawh lo, ka pi chuan a tuibur fawp ri barh barh chungin; ka zirpui hmeichhe naupang pakhat nen chuan, kan vangkhawpui hnuchhawnin kan khaw thenawm panin kan inzui ve dat dat a. Thlasik khua a intan tawh a, a nuam tawkin khua a dai tawhin, zo kawng han zawh pawh a hrehawm lem lo.

(more…)

Posted in Luangliam, More than words | 19 Comments »

Delhi a Mizo nula pawngsual tum chungchang kha – News Update

Wednesday, September 26th, 2012

Hemi chungchang hi misual.com ah hian kan post tawh ngeiin ka hre sia, ka hmu zo ta miahlo. Hmana news rawn chhuak chu – Tun kum June ni 20 (wednesday zan) khan Delhi Vasant Kunj a club pakhatah Mizo nula kum 18 mi chu a kal a, chuan Thursday zing lamah club atanga haw a tum chu mipa pathumin an motor in an drop ang an tia, a ni pawh chu motor ah chuan a lut ve ta mai a. News report sawi dan chuan pawngsual an tuma, mahse hmun rem an hmuhloh avangin an chhuah ta a. Chu nu chu police hnenah a report nghal a, June 23 chuan chung mi pathum te chu police ten an man nghal a ni.

TOI: Three held for abducting Mizo woman

Three men-two of them students and the other a private company executive- were arrested for the alleged abduction of an 18-year-old Mizo woman from outside a club in south Delhi with the intention to rape. The men drove her around town for close to two hours before dumping her at Chirag Dilli flyover. They didn’t rape her, said cops, because they didn’t find an isolated spot.

Hemi thil ka rawn hai chhuah leh nachhan chu, tun lawka news kan dawng dan chuan heng mi pathum an man te hi, Mizo nula hian a identify theihloh avangin court chuan Jail atanga chhuah turin thu a pe a ni! Additional Sessions Judge Yogesh Khanna sawi dan chuan Mizo nula hian a identify theihloh mai bakah an hming hi complaint a thehluh ah khan a chuanglo a ti bawk a ni. Chanchin kim chang chu a hnuaiah hian in chhiar dawn nia…

(more…)

Posted in News | 19 Comments »

Thlam kangah BIBLE a kang ve lo

Wednesday, September 26th, 2012

Kum 2003 kha ni ta in ka hria, ka pu te hi an lo (huan nghet) khua atanga hla vaklo a an thlam ah hian an riak thin a, tah chuan ka pi hian Holy Bible hi a riah a, tlai khat (Inrinni tlai a ni a) Pathianni hmanga khua a an haw tur khan mei an lo leihhlum lova, zan an inkhawm ban chuan an lo zawn chu alo eng pup mai a, an thlam chu alo kang nasa hle a tawh a, a hmunah te an zuk kal a, mahse tihtheih a awm loh avangin a haw leh mai a. A tuka an zuk kal chuan a kang nasa bawk aniang, a chunga an hman rangva te chu alo sawr chhe rem rum mai a, an chana bel leh bawngtuthlawh te pawh a sawr chhe vek a, a chhuat thingphel leh a bang a an hman dap te phei chu a vap bak hmuhtur a awmlo hrim2 a. An thlam hi thlam lian tak ani a, a kan chhung pawh a rei duh khawp ang.

Chutia kang nasa hle e tilo chuan an khum lu a an Bible dah chu a kawm zawng kangin a thu ziak chin zawng a kang bang anih chu. A tlang kual den2 a thu ziak awm lohna chin chiah2 kha a kang vek bawk a, a thu chin zawng tih loh chu a kang vek. Lehkha te chu kang duh ber awm ani a. mak kan ti khawp mai a, mahse ka pi chuan mak ti mah ta che u “Pathian a awmlo titu te hnena Pathian awmzia chiang taka kan sawi theih nan Lalpan thil ropui min tihsak anih hi, LALPA CHU FAKIN AWM RAWH SE” ati a.

Posted in Religion | 31 Comments »

Mizo Lehkhabu Online in lei theih ta

Wednesday, September 26th, 2012

Mizo lehkhabu te a details tlem tal net a han en tum chang hian browse tur mumal a van thin êm vanga bul kan tan LEHKHABU.COM chu peih thawkhat a ni ta. Lehkhabu dawr neisa kan nih loh avangin lehkhabu lâkkhawm chawp a ni a, chuvang chuan lehkhabu erawh duh angin kan la nei tam lo khawp mai, kan lakhawm mêk zel e.Thu ziakmite pawh in lehkhabu te online a min lo phochhuah tir turin hemi post kaltlang hian kan ngen ngal a che u.

Mizo Ziakmite hi fak an phu hle a,lehkhabu an sual hrep hnu ah publisher mulmal tak kan la neih loh avangin an mahni in an publish tlangpuia, chumi hnu ah distributor mumal awm hek lo an mahni bawkin dawr ah an sem kual leh a,Chu mai a la ni lo a man khawn thlengin kan ziakmi te hian an buaipui vek thin a. Hetiang khawp a lehkhabu ziah buaithlakna ramah lehkhabu tha chhiar tur heti zo zai kan nei thei hi. Mizo te hi kan vannei hle a ni.Thuziak miten he website hi rawn inti tatu em em ula, sawisel kan ngaihna lai ah min lo sel bawrh bawrh a, thurawn min pe thin turin kan ngen a che u.

Website details sawi duah lo in,tlem erawh han tarlang ila. India ram chhung chauh ah kan la deliver thei rih. Shipping charge hi location a zirin a danglam a,details hetah hian a chhiar theih Click Here

Posted in Books, Information | 24 Comments »

Nuclear Energy: Malsawmna nge Anchhia?

Wednesday, September 26th, 2012

Nuclear Energy chu enge?

Thil engkim siamtu hi atom a ni tih kan hre theuh awm e. Chu atom chu electron, proton leh neutron belbawmin a siam leh a. Saihlum mum ang hian atom chu han suangtuah ta ila. A chhung laiah tak chuan proton leh neutron te chu te lutukin a inhlawmkhawm leh a, chu chu kan khawvelin (earth) ni (sun) a hel ang hian electron hian a helkual ta thin a ni. Proton leh neutron inhlawmkhawmin a siam chu nuclues tiin am hming an vuah a. Chumi awmzia chu electron chuan nucleus chu a hel thin tihna a nih chu. Chu nucleus chu Saihlum mum anga ngaih leh tur a ni. Mahse nuclues hi atom nena khaikhin chuan a te khawp mai . Entirna mawlmang tak pe chin teh ang: Nuclues chu baskeket ball tiat ni ta sela atom lenzawng chu a lai hawlhtlangin Km 60 chuang a ni daih dawn a ni. Thil mum tereuh te – nuclues chhungah chuan khawvela tha chak ber – nuclear energy an tih chu Pathianin a dah a ni.

A nihna takah chuan keimahni taksa pawh hi atom siam vek a ni a mahse keimahni min siamtu atom chhunga proton leh neutron te hi chu an awm nghet (stable) em avangin tha chak tak – nuclear energy hi a lang chhuak lo mai chauh zawk a ni. Mihring taksaah hian iron, cobalt, copper, zinc, iodine, magnesium, sodium, calcium, nitrogen, oxygen, sulphur, chlorine, nickel, chromium, ldt., a awm a. Mahse vanneihthlak takin a chunga kan tarlan nucleus-te khian painhmang nghet tak (stable) an nei a , nuclear tha chakna an pe chhuak ngai lo a ni. Chutih lai chuan uranium, thorium, leh a dangahte chuan nuclues chhung pianghmang hi a nget lo tak (unstable) a nei thung a . Chuvang chuan thazung chak tak – nuclear energy an pe chhuak thei ta thin a ni. Chu tha chak tak mai chu mithiam te’n mihring tana tangkai thei turin Nuclear power plant hmangin an sawngbawl leh ta a. Nclear Energy hmangin electric current (power supply) an siam chhuak ta a ni. Chu mai chu a la ni lo – ram venhim nan leh ramdang run nan an hmang bawk a. India pawhin kum 1998 khan Pokhran thlalerah a nuclear bomb neih chu a lo enchhin tawh a nih kha.

(more…)

Posted in Opinion | 44 Comments »