Vanneih a siamin Mizo ṭawng thiam zet mai thianpa Zara (Zara Stinger Khiangte) hian an ina chaw ei tura min sawm a zarah a lehkhabu pakhat ‘Mizo tawng ziah dan’ tih Mizo Language Committee buatsaih chu mi hawhtir hlauh mai a. He lehkhabu hi lei tur ka hmuh loh avangin ama ta hi ka kawl ta deuh chawt mai a, he lehkhabu ka hmuh dân tlangpui hi ka’n ziak ve reng reng teh ang.
He lehkhabu (Zara ta) hi first edition a ni a, kum 2008-a tihchhuah niin a kamkeuna aṭanga chhiarin a phek tawpna thleng hian phek 69 a ni a, thupui bung hrang hrang 4-a ṭhen sawm a ni bawk. A man pawh hi Rs 15 man lek a ni a; a hlutna hi a man aṭanga teh chi erawh a ni hauh lo thung. He lehkhabu hi a copy an siam tlem deuh erawh a pawi ka ti a, a pan na vang vangin thu a fûnkim em em thung a, ziak mite leh chanchinbu mite tan chhawrnahawm tak a nih ngei pawh ka ring. Mahse, kei ve tehlul hian duh khawp lohna lai leh heti ang hian tih ni ta zawk se la tih ka nei nual mai.
A bu hming hi a ṭha viauin kei ka hre pek a; ‘ziak’ hi chu ‘ziak’ tih char char tur tih ngaih dân kha he lehkhabu hian a pawmpui lo tih a chiang viauin ka hria. ‘Mizo Ṭawng Ziah Dân’ bu a nih ang ngeiin ‘ziak’ hi a chang chuan ‘ziah’ tih a ṭul hun a awm ve bawk ṭhin reng a ni. Mizo tawngah hian thumal ṭhenkhat modified form inang nei hi kan nei nual a, ‘ziat’ hi a châng chuan ‘ziah’ tih a ṭul hun a awm a, ‘ziak’ pawh hi a châng chuan ‘ziah’ tih a ngaih hun a awm ve tho a ni. Chuti ang bawk chuan ‘vât’ pawh hi ‘vah’ tih a ngaih tlat tum a awm a, ‘vâk’ pawh hi ‘vah’ tih a ṭul hun a awm bawk. ‘Thlo’ pawh ‘thlawh’ kan ti a, ‘thlâwk’ pawh ‘thlawh’ kan ti ṭhin tho bawk. ‘Ak’ pawh ‘ah’ kan tih a ngaih chang a awm a, ‘at’ pawh a chang chuan ‘ah’ kan tih a ṭul chang a awm. ‘Tho’ pawh hi a chang chuan ‘thawh’ kan ti a, ‘thawk’ pawh hi ‘thawh’ tih a ngaih ṭum a awm bawk. Chu vang chuan modified form inang avanga buaina tawk tura kan inngai tlat a nih chuan heng modified form inangho pawh hi kan chhawk ṭhen a ngai dawn tihna a ni ang.
He lehkhabu buatsaihtute hi Mizo ṭawngah na na na chuan mi thiam anga kan neih mi 27 lai an ni a, an lehkhabu buatsaih pawh hi a ṭha hle rêng a ni. A Thuhmahruaia, “Tûn dinhmunah hian Mizo ṭawng ziah dân kaihhruaina fel tak a awm loh avângin ziaktu hrang hrangin tih dân inang lo tak takin an ziak mai a,” tih hi, “Tûn thleng hian Mizo ṭawng ziah dân kaihhruaina fel tak a awm loh avangin ziaktu hrang hrangin ziah dân inang lo tak takin an ziak mai a,” tih ni ta zawk se la, a thu hi a mâm zawk ang em? A Kamkeunaa mi, “Sub-Committee No.1 chu a theih anga chaka thawk nghâl turin a ngên a,” tih pawh hi a dik meuh lo. Hetah hian ‘thawk’ hi transitive verb ni siin intransitive verb angin an hmang a, hei pawh hi, “Sub-Committee No. 1 chu a theih anga chaka hna thawk nghâl turin a ngên a,” tih zawk tur a ni ang. Paragraph hnihnaa mi ‘ngaih fuh loh’ tih pawh hi ‘ngaih sual palh’ ti se la a mawi zawk ang em?
Bung 1-naah hian paragraph chungchang a inziak a, hetah hian ‘chu vangin’ tih hi an hmang a, hei pawh hi a dik meuh lo. Chu vang chuan, hei vang hian, kha vang khan, chuti ang chuan, heti ang hian, khati ang khan leh a dangte tih zawk tur a ni ang. Chu vangin tih hi a dik kan tih ṭalh chuan ‘kha vangin’ tih leh ‘hei vangin’ tih pawh hi a dik kan tih ve a ngai ang.
Bung 2-na hi hawrawppui hmanna chungchang bik a ni leh a, heta No.2-a mi ‘Hming bik zawng zawng bulah’ tih hnuaia entirna an dah ‘Thawhṭan’ tih ringawt pawh hi a dik meuh lo. Thawhṭanni tih ngei tur a ni. Ningani erawh chu an ti ‘Ninga’ êm lo e. Thawhṭan, Thawhleh, Nilai, Zirtawp, Inrin tih te hi chu tunlai ṭhangtharte chin chhuah mai mai a ni a; hei hi hman zui tlak a ni lo. Thawhṭanni, Thawhlehni, Nilaini, Ningani, Zirtawpni, Inrinni, Chawlhni tih zel tur. Thawhṭan zan tih pawh hi a dik lo va, Thawhṭanni zan tih zel tur. Chawlhni zan, Inrinni zan leh Ningani zan erawh hi chu kan la hmang dik vek hlawm thung a. No. 8-a mi ‘Zawhna leh chhinchhiahna hman zawh chiaha thu bul ṭannaah’ tih hnuaia entirna an dah, “A nalh hle mai a! Eng zât man nge?” tih pawh hi ‘nalh’ ai chuan ‘mawi’ hmanna tur a ni zawk mah ang. Nalh hi chu adverb anga kan hmang a nih loh chuan mihring leh nunna nei bika hman hi a inrem ber. Tunah chuan kawr mawi pawh kawr nalh te kan ti duh ta zel a nih hi maw!
Bung 3-na hi chu chhinchhiahna (punctuation) thlûr bingna bik a ni a, hetah hian Comma hmanna tur bika entirna an pêk zinga mi, “Lali, Mawii, Puii leh Tluangi-te an lo kal,” tihah hian hyphen dah hi a ngai lo a ni. Hetah hian ‘te’ hi conjunction a ni a, a hmaa thu nen ziah zawm a ngai lo a ni. Hei pawh hi duhthusam chuan ,”Lali te, Mawii te, Puii te leh Tluangi te an lo kal,” tih zawk tur a ni ang. Comma chungchang bika sub no. 2 entirnaa mi, ”Zîng takah tho la,” tih pawh hi, ”Hma takah tho la,” emaw, “Zingah hma takah tho la,” emaw tih zawk awm tak a ni. Semi-colon hmanna entirna atana an dah, “Hmangaihna hi engtikah mah a reh lo vang,” tih pawh hi a dik meuh lo. Hmangaihna hi chu a dai emaw a chuai emaw kan ti ṭhin a; hmangaihna a reh zo ta erawh kan ti ngai lo thung. Chuai thei lo hmangaihna, dai ngai lo hmangaihna te kan tih theih laiin; reh ngai lo hmangaihna erawh kan ti ngai lo thung. Khungna bikah hian khungna tê (‘ ’) tih hi vawi 2 lai an hmang a, hawrawptê tih an hman tho chuan hei pawh hi khungnatê tih ve awm tak a ni. ‘Hawrawppui’ tih an hman laia ‘hlawm pui’ tih an hmang (phek 16-na en la) erawh hi chu hriatthiam a harsa deuh. Hei pawh hi ‘hlawmpui’ ti ve ta law law se la, suffix-a ‘pui’ an hrilhfiahna leh a hmanna an dah nen hian a inrem zawk awm e.
Hawrawp bânna bik hi mihring hmingah hian hman ṭul kan la ti lo zel niin a lang. He lehkhabu bikah pawh hian entirna a pek reng rengah chuan Luka’n tih ai chuan Lukan tih te an hmang zel tho a, Bible-a a inziah dan an la chhawng kan ti a nih chuan Bible thua mi, “A tirin thu a awm,” tih chu hmang lovin “A tirah thu a awm,” tiin (phek 34-na en la) an hmang dik thung lawi si a ni. Hawrawp banna hi mihring hmingah pawh hian telh ni tawh se la a tha ang. “Lalin Thanga a ko,” tih pawh hi hawrawp banna tel lo chuan awmze phir nei thei a nih hi. “Lali’n Thanga a ko,” tih a nih theih laiin ,”Lal (chief,king)-in Thanga a ko,” tihna a ni ve thei tho bawk si a ni. Chu vang chuan heti ang chi-ah hi chuan Lali chuan, Thanga chuan leh a dangte tihna a nih avangin Lali’n, Thanga’n tia hawrawp banna hi hman zel ni se kei chuan a dik zawk mahin ka hria.
Bung 4-na hi ziah zawm leh ziah zawm loh turte thlûr bingna a ni leh a, he bung 4-na bik hi he lehkhabu-ah hi chuan chhawrnahawm lai ber tur leh chhawrbawl ber tur niin a lang. A chhung thu pawh a tam bik a, phek 20-na aṭanga inṭanin phek tawpna ber phek 69-na thlengin a awh a; a vaiin phek 49 lai a awh tihna a nih chu. Thupui hlawm hrang hrangah ṭhen niin prefix, suffix, ziah zawm loh turte leh ziah zawm turte, ziah zawm ṭhin ziah zawm loh turte anga ṭhen sawm a ni leh a ni.
Prefix bik hi- in, ti leh inti tih tea ṭhen a ni a. An sawi tel loh pawimawh ka tih si; ṭhahnem ngaihna avangin sawi tel nual ila a ṭha ang. Thuhmabet atana ‘in’ hi kan hman chuan thil titu kha thil tih tuartu a lo ni ta thin a, chumi chu reflexive verb tiin a hming hi vuah ila a fuh ber awm e. Thuhmabet ‘in’ hi intransitive verb bikah chuan behtir ve loh tur a ni. Mahse, intransitive verb-ah rau rau pawh ‘phun’ bikah erawh hi chuan kan hmang ṭhang bawk a, hman chhunzawm zel ni se la a pawi lo ang (kan inphun lungawi mai mai zel bawk a). Intransitive verb dangah chuan inmu, inmeng, inzung, inzai leh a dangte ang hi chuan hman ve loh tur a ni thung ang. Prefix ‘ti’ hi chuan a behna thu kha adjective a nih chuan transitive verb-ah a siam a, a behna thu kha intransitive verb a nih chuan transitive verb-ah a siam ṭhin thung. Heng kan sawi takte pawh hi ziah tel ve ni tawh se la a ṭha khawp ang.
Suffix bik erawh hi chu a tam ta deuh a, sawm leh panga lai he lehkhabu-ah hian a awm a ni. Suffix kan neihte chu- a, ah, awm, ho, in, na, pui, sak, san, te, tê, thlâk, tîr, tu leh zia te hi niin he lehkhabu hian a sawi a ni. He lehkhabua awm lo leh kan grammar bu chhuak tawhhovin tun thlenga an la hmaih; suffix ni ve bawk si chu ‘phung’ leh ‘siak’ te hi a ni. Heng suffix pahnihte pawh hi kan grammar bu-ah hian telh ve ni tawh se la a lawmawm khawp ang. ‘Phung’ hi chu kalphung, nunphung, pianphung, khawsakphung leh a dangte-ah hian suffix angin kan hmang a; ‘siak’ erawh hi chu reflexive verb bikah inkahsiak, intlansiak, inhriatsiak, inzuansiak, inhmuhsiak leh a dangte ang hian kan hmang ṭhin thung.
Suffix lam hi a sawi fiahna a ṭha-in han sawisel ngai lai a awm meuh lova; mahse, uluk tawk loh avanga tihsual erawh chu an nei nual a ni. ‘Pui’ chungchang bika entirna an pek pawh hi ‘Lui leh tlâng lam’ tiha ‘hruipui, keipui (thei), thingpui, bepui leh sârzûkpui’ te han dah ngawt mai te hian mi a tibuai thei viau mai. Hengho hi lui hming emaw, tlang hming emaw tih mai tur a ni. ‘Khua leh in lam’-ah tih thupui an vuahah lah hian ‘buhpui’ tih hi an dah bawk a, a thupui leh entirnate hi bengthara ngaihtuaha fel taka rem ṭhat leh chi a ni. ‘Pui’ hi intransitive verb-a kan behtir chuan a behna verb kha transitive verb-ah a siam bawk thin. Heng intransitive verb- kal te, zung te, meng te leh a dangte-ah hian suffix ‘pui’ hi kan behtir chuan kalpui te, menpui te, zunpui te leh a dangte hi transitive verb a lo ni ta ṭhin a ni.
Suffix ‘tê’ bikah hian, “Mihring leh thil dangah a tê chi sawina hminga ‘tê’ hi suffix a ni a, a hming pangngai nen ziah zawm zel tur,” tiin he lehkhabu hian a ziak tak na a; a hmaa kan sawi tawh khungna tê (‘‘) tia an lo hman tawh kha hemi ṭan chhan vek hian khungnatê (‘ ‘) ti zawk se la, an thu a inbat lo zawk ang.
Suffix ‘sak’ te, ‘san’ te leh ‘tir’ te pawh hian a behna verb kha intransitive verb a nih chuan transitive verb-ah a siam thin.
“Suffix ‘tu’ bik hi intransitive verb-ah an behtir ngai lo,” an ti a, hei pawh hi a pawmawm khawp mai. A entirnaa an dah, “Zaitu tih hi a dik lo,” tih pawh hi a pawmawm hle bawk. Tunlaiah chuan singer lehlinna atan hian ‘zaitu’ an ti mai zel a, hei pawh hi ‘zaipu’ ti tawh ila a tha phian ang. “Hmeichhe tan chuan zaipu nih hi a inrem ve chiah lo,” kan ti a nih chuan chairman pawh hmeichhia an nih theih tho hi maw! Heta a ni lo lam (negative) verb thumalah chuan ‘tu’ belh loh tur tiha entirna an dah zinga mi ‘sumdawngtu’ tih pawh hi ‘sumdawngte’ tih tur an tih pawh hi a dik khawp mai (singular bikah chuan sumdawng). Hei pawh hi a verb anga ngaihtuah chuan intransitive verb tho a ni a (verbal adjective pawh a ni thei tho), chu vang chuan sumdawngtu tih pawh hi a dik ta chuang lo a ni. Pu Rokunga erawh kha chuan,”Sumdawngtuin a sum zawng zawng…,” tiin a hmang thung a, hei pawh hi, “Sumdawng miin a sum zawng zawng…” tih ni ta zawk se la, a dik zawk hial mai thei a ni.
‘Ziah zawm loh turte’ bikah hi chuan sub. No. 17-naa mi, “Zui (v) hi a hmaa thu nen ziah zawm lova a hranga ziah tûr a ni,” tih hi a dik meuh lo. A entirna an pek zawng zawng heng- bawh zui, chîl zui, en zui, ngaihtuah zui, pawm zui, ûm zui, vuan zui, zawng zui leh a dangte-ah erawh hi chuan ‘zui’ hi verb ni lovin adverb vek a ni bawk si a; hei pawh hi ‘zui (adverb)’ tih ngei tur niin a lang.
‘Ziah zawm hun leh ziah zawm loh hun awm ve ve thumal ṭhenkhatte’ tihah hian sub. No. 2-a mi, “Bo hi prefix nêna hman- tibo, tihbo tih ni lovah chuan a hmaa thu nen ziah zawm loh tur a ni,” tih hi tlemin sawi fiah leh zual se la, “Bo hi prefix nêna hman- tibo, tihbo tih ni lovah chuan adverb anga kan hman chuan a hmaa thu nen ziah zawm loh tur a ni,” ti se la; ‘bo’ hi adverb anga hman a ni ṭhin tih hi sawi lan ni se la a chiang leh zual ang. A entirna an pek- bi bo, chawk bo, dah bo, hnawt bo, kal bo leh a dangte-ah hian ‘bo’ hi adverb a ni vek bawk si a.
Sub. No. 11-a mi, “Fiah hi adjective a ni a, a hmaa thu nen inzawm lova hman ṭhin tûr a ni,” tih pawh hi a entirna an dah nen hian a intu meuh lo. ‘Fiah’ hi adjective a nih chuan tu pawhin kan ziah hran vek ka ring; adverb a nih chiah hian a ni ziah hranna chang kan hriat loh ṭhin ni! A entirna an dah- en fiah, hmu fiah, hre fiah, lang fiah, sawi fiah, zâwt fiah leh a dangte-ah erawh hi chuan ‘fiah’ hi adverb vek a ni. Hei pawh hi, “Fiah hi adverb a nih chuan a hmaa thu nen inzawm lova hman ṭhin tûr a ni,” tih ngei tur a ni ang (verb leh adjective anga kan hmanna chu sawi lovah lo lum ta ila).
Sub. No 18-a mi ‘lo’ chungchang bik pawh hi a entirna an dah hi khawi zawk hi nge pawm tur hriatthiam a har hle. ‘Ni lo’ tiha ‘lo’ (adverb) hi a hmaa thu nen ziah zawm lova ziah hran tur a ni tih entirna atan hian ‘ṭawmkai lo’ tih hi an hmang a; a hnuaiah vek hian ‘lo’ tih telna chu tawngkam pangngai leh thil hming anga hman a nih chuan ziah zawm tur tih entirna an pek zingah hian ‘ṭawmkailo’ tih hi an telh leh tho a, pawm zawk tur hriat har tak a ni.
Sub. No 22-a mi ‘ral’ pawh hi adverb anga hman a nih chuan a hmaa thu nen zawm loh tur tih ni se la, verb anga dah tawp hi chu a fuh meuh lo. Dek ral, hmang ral, kang ral, luang ral, mawih ral leh a dangte-ah hian ‘ral’ hi verb ni lovin adverb ngei a ni si a.
Sub. No. 24-a mi, “Thiam (v) hi prefix- ti, inti, intih ni lo thu dang dawta a awm chuan mal din a ni a, a hmaa thu dang nên ziah zawm lova a hranga ziah ṭhin tûr a ni,” tih pawh hi a dik meuh lo (thu mal din tih zawk awm). ‘Thiam’ hi verb a nih chuan kan ziak hrang deuh vek a, adjective a nih hun leh adverb a nih hunah zawk hian ziah hranna chang kan hre lo leh ṭhin. A entirna pek hêng- mi thiam, lehkha thiam, inkhelh thiam leh a dangte zawngah hian ‘thiam’ hi adjective a ni a; hêng- chhân thiam, lên thiam, koh thiam leh a dangteah erawh thung hi chuan ‘thiam’ hi adverb a ni thung.
Sub. No. 29-a ‘vâr’ pawh hi- ha vâr, kawr vâr, mal vâr, puan vâr leh a dangteah hi chuan ‘vâr’ hi chu ‘adjective’ a nih avangin a hmaa thu nen ziah zawm loh tur tih ni zawk ta se la a ṭha ang. Parts of speech nei hrangho hi chu a parts of speech nihna ṭheuh kha sawi lan theih zel ni se la, a chhiartute tan chhinchhiah a awl zawk ngei ang le.
Eng pawh khaw pawh chu ni se la, he lehkhabu hi a tê na vang vangin a khîn nalh mai a ni. A chhunga thu inziak tha tak takte hian a uai rit a ni ber zawk awm e. A chhunga thu awmte hi a zira zir tham a ni a, hei hian Mizo ṭawng ziah dâna inhnialna awm ṭhin tam tak chu a sut kian ngei pawh ka ringin ka beisei a ni. Duhthu a sâm lohna lai kan han sawi chhuah takte erawh kha chu chhut nawn lehah chuan an rawn siam ṭha tawh turah ngai ila. Kei chuan he lehkhabu hi kawl ṭhat tlak, zir chian tlak, belhchian tlakah ka ngai tak meuh meuh a ni. Thu leh hla lama tui mi i nih ngat phei chuan lei ve ngei ngei ang che tih hi ka thu bengzeh duh che leh ka thu rawn duh che chu a ni. He lehkhabu aṭang hian thiamna i paw chhuak ta lo a nih pawhin i mâwl belh chhah kher lo ang tih hi chiang takin ka hrilh ngam sak ache. Chu vang chuan lei tur a la awm a, i hmu a nih ngai chuan lei ve mawlh teh khai. I inchhir hauh lo ang.
Note: Kei pawhin he thu ka ziah zawh tawh hnu-ah hian bazar-ah sawn he lehkhabu hi ka va zawng kual leh ngat a, dawr pakhat chuan an lo nei hlauh mai. Mahse, a man hi Rs 20 an lo ti hman tawh a ni.
Similar Posts:
- Mizo ṭawnga ziah zawm leh zawm loh tur te-III
- Mizo ṭawnga ziah zawm leh zawm loh tur te-II
- Mizo tawng zir ang. Then 1-na
- Mizo ṭawnga ziah zawm leh zawm loh tur te
- Kan zain i bei ang u
June 26th, 2013 at 10:09 pm
chhiar chiah ila
Report this comment
June 26th, 2013 at 11:44 pm
Chhiar a manhla hle mai. Ka hlawkpui tak zet a ni. ( I comment hi a ni zawk mah).
A bik takin hawrawp banna chungchang i rawn tarlang hi ka lawm; kei paw’n ka lo vei em em thin a ni a, tunlai thuziakah hian an hmang lo deuh vek tawh lehnghal niin ka hria. Bible-a ‘LALPAN’ tih pawh hi kei chuan, LALPA’N tiin ka ziak deuh kher thin.
Mizo tawng thiam tak i nihzia a lang a, ka mi duhzawng tak i ni.
Report this comment
June 27th, 2013 at 1:35 am
Tihtur dang nei miah lova hman taka chhiar ngai chi a ni maw hehe
Report this comment
June 27th, 2013 at 7:44 am
Chhura buh en thuak thuak teh ang.
Report this comment
June 27th, 2013 at 10:14 am
Mizotawng hi a har zek nia. A bikin Prefix leh suufix te, ziah zawm leh zawm loh tur te, V hman leh hman loh angte hi, inzirtirna mumal tak neih a tha khawp mai. Pu Zara leh Pu Terema te pawh hi tunlai miah chuan, a thiam pawl tak anniin ka hria.
Report this comment
June 27th, 2013 at 10:05 pm
A sei diah duah hle mai. Ka chhiar chhuak vek a, mah se ka ma mawh tak ka la hmu lo. Thu uar na hi,
eng ti-a tih tur nge le?
En tir nan, ka va ngai tak che em
tih ah hian, em tih lai tak ah hian ka buai. Thu tawp na ah hian, a awm deuh zel a. EM hi zawh na a ni chang a awm rual in, thu uar na a ni thin bawk si a. Post tu pa hian,
tih dan tur min hrilh teh se.
Report this comment
June 27th, 2013 at 10:52 pm
Hei zet chu ka tangkaipui dawn hlein ka hria. Ziak tha e. Ka lawm e.
Report this comment
June 28th, 2013 at 12:02 am
#6, I buaina khi chu chhan a har lem lo. Mizo tawng hi a thluk a zirin a awmzia a danglam daih thei a, ’em’ pawh hi zawhna atana kan hman chuan kan lamri tawi deuh hat thin. Mahse, em tih vek hi kan han thluk fan deuh hian thu uarna a lo ni leh ta mai a ni. ‘In’ ringawt pawh hi kan thluk dan avang hian a danglam thei khawp a nia. “Zu in in in in-in, in in-in in in-in in in-in a tul thin,” tihte pawh hi pronoun, prefix, suffix leh verb angin ‘in’ ringawt pawh hi a hman theih a ni.
Report this comment
June 28th, 2013 at 12:08 am
A sei viau na chungin kan chhiar chhuah hram chu….ka lo hmuh ve dan chuan tawng(language) hi evolve reng a nih zia i rawn thai lang mai ah ka ngai, hei hi a dik ber, han tihtur in a dikber a pawh hriat manglo khawp a ngaihdan hrang a tam lai hian kan thusawi tum awmzia min an hriat a pawimawh ber tih a lo dik zia a ti lang bawkin ka hria. Ziahdan inang rau2 ah pawh mithiam theuh2, in duhdan leh hriat dan a inang lo deuh thum mai tih chu i thuziah hi a ti chiangtu pakhat a ni awm e.
Generation hran a cheng te tawng hman dan inang lo mek te, geographical area hran avanga tawng dan danglam mekte hi a ti hausa tu point lian tak chu a ni mai awm e. Hnam transition period a awm mek tawng hi a va hausa chak em tih erawh a lang a lawmawm lam a ni e. Tin, i thuziah tum tho midangin a ziah dan danga an ziah mahse a thuken inang tho te hian mizo tawng a ti hausa lehzual. A sei viau na chungin ngaihnawm chhiara kan chhiar zawh thak chu…….
Report this comment
June 28th, 2013 at 5:30 am
Hman el-awlah ulukly-in chhiar ang aw
Copy-save hmaks e
Report this comment
June 28th, 2013 at 11:23 pm
save hmekss..
Report this comment